الوطن

[Saydia]

الوطن بستان وفلح .. وريحة عنبر المشخاب

الوطن كركورة طفل يلعب .. و يختل وره الباب

الوطن رطب برحي .. وجرف يحضن الخنياب

الوطن شعر شعبي .. وقصيدة ونظم سيّاب

الوطن وادي وجبل .. هور ونخل وحْباب

الوطن خاوه الحزن من حجّاج.. ولسه ما نعرف الأسباب

السبب دم الطفل وحسين.. ووياهم جثير أسباب

وما ينفك هلحزن يا ناس .. لمن يطلع إمام الغاب

***

الوطن ناي إبحلك عازف توالي الليل

الوطن مهرة إمعضّله إتسابك الخيل

الوطن مزيونه إمعطره أبريحة الهيل

الوطن كَمر صافي يحلّي السهر بالليل

الوطن خِضار وسما وزركَة إسهيل

الوطن مثل المريض الشفة ورد بيه حيل

****
الوطن كَفلة إحديثات يملن ماي

الوطن قيثارة ولحن بالناي

الوطن ريحة هيل وسط الجاي

الوطن هور وزلال الماي

الوطن مضيف ونخل وفياي

وبْلايه الوطن تبقى تطك هاي أبهاي

****


الوطن رمان العطيشي .. وبرتقال ابشهربان

الوطن ركًي الموصل .. عطر النجف بالليوان

الوطن تمر الفاو .. ومنارة إبفلوجة الشجعان

الوطن ناعور راوه وهيت .. إبطرف بستان

الوطن تاريخ الزلم .. يا نكَرة السلمان

الوطن أم وحضن ... للخايف وبردان

****

الوطن يا خي موال وقصيدة وهلاهل

الوطن يا بيت الشَعَر ياقصر الشناشل

الوطن صوباط العنب يا صوت البلابل

ياوطن سلـّوك إبحجة كذبة الشامل

الوطن يا خي بيت وشرف للي يستاهل

الوطن يرفس كل عميل وخاين وعايل

الوطن كاعد علنفط.. عيب إيعيش أهله عللفلافل؟

عيب إيعيش أهله عللفلافل
عيب إيعيش أهله عللفلافل

منقول


saydia

[bint Dijlh]

تسلم وتعيش أخي السيديه
شعر شعبي جمييييييل جداً ووطني
حياك الله بيناتنا

[النورس المغترب2006]

شكرا اخوي عاشت ايدك

[ساسوكي شايل سيفه]

مشكور حبي وعاشت ايدك كلش حلووووووووووو

[بســ وطن ــمة]

الوطن هو اغلى ما نملك

شكرا لك على القصيده

[النورس المغترب2006]

شكرا على الموضوع الراقي جدااااااااااااااا

[حنونه]

تسلم اخي تحياتي لك
حنين

[المبرمج العراقي]

ومن اغلى من الوطن

لكل الناس وطن يعشون فيه الا نحن فالوطن يعيش فينا

[ذكرى]

وبلايه الوطن تبقى تطك هاي بهاي,تسلم اخي الكريم على الكلام الطيب واداءك الذي اطرب مسامعنا ومهما نقول بحق الوطن فهو قليل.رمضان كريم وعساك من عواده ودمت بألف خير.::13::

[ஐ° ◦° بنت الاعظمية ° ◦°ஐ]

مشكور عاشت ايدك اخوى