مع الاســـــــــــــــف معماري.... خيــــــــبتو ظني

[الفهــــــــــرر]

السلام عليكم

شلونكم شباب وبنات
اني بها الموضوع اريد اقدم عتاب على المواضيع المنزله في هذا المنتدى
لان اني من دخلت تصورت راح اشوف مواضيع معماريه وتصاميم بس انصدمت من شفت اغلب المواضيع هي شعر وخواطر حب لا اكثر
واني ما اريد اعترض على الشعر والخواطر بس اكو مكان خاص هو منتدى همسات الحب ومنتدى الشعر


يعني هسه اني كاعد اقره اسماء المشاركين كلهم معماري بس هو وين المعماري كلهم ما شاء الله صايريين شعراء مع ذلك اني كلت اكو مكان خاص للشعر

واتمنى ان نشوف مواضيع معماريه جديده وحلوه
ومو تزعلون مني لان اني احجي لمصلحتكم

لان اني احب القسم المعماري وازوره بين فتره وفتره بس اشو هسه من زرته ما شفت شي معماري لو رايح لمنتدى همسات الحب احسن

وشكراااااااااااااااااااااااااااااااااااااااااااااا ااااااااااااااااااااااااا

تحياتي الفهـــــــــــــــــــــــرر

[مستقيل]

اهلا وسهلا حبي فهرر حلوة المبادرة مالتك واني من اشد المؤيدين انوا افتقار المواضيع المعماريه في قسم الهندسة المعمارية ولكن صدكني مو على مود قسمي المعماري... المعماري يدخل في كل شي بالحياتك حتى الشعر تصميم فن وابداع فكل شي تبدا به لازم له تصميم وبدايه لتنفيذ مشروع له خطوات للوصول الى ناتج وقد تستغرب ان ممكن بيت شعري يوحي لك تصميم مدينه كاملة من خلال بيت شعري فهنالك معماريون يستلهمون الافكار من خلال الشعر ......ولكن ارجع واقول ان قسمنا يفتقر لمواضيع المعمارية وهنالك اشخاص يهتمون بالتنويع فكلشي عدنه اخويه فهرر وتقبل ردي وتسلم مليون مره على وجودك

[المعمارييية]

والله بس قريت العنوان صرت اعصاب
اخوية الفهر السلام عليكم اكيد ما زعلانين عليك ابدا وعتباك على العين والراس واني هم كمت واسال الكل كلنا بدينا نحس انه المنتدى تغير وتوجهه ايضا تغير بس صدك مثل ما كال اخوية مستقيل انه المعماري(بكلشي حاشر خشمه) او خلي نكول انه التصميم متعلق بكل نواحي حياتك مثل النظام اللي موجود بحياتنا مرتبط بكل شي وعتبي اني وكل الاعضاء وكلتها اني مرة انه اللي عنده موضوع شعري لو خاطرة اكو منتدى خاص بهل المواضيع واذا تريد تشوف المنتدى شوفه اول صفحة بي والثانية والثالثة ودقق زين لان اكو هوااااااااااية مواضيع معمارية وهسة هم اكو مواضيع وما ادري شكولك بعد لان مددا اكدر اوصلك فكرتي بس حبيت اوضحلك انه اكو هواية مواضيع معمارية وعتبك واصل بس لاتنسى اكو مواضيع جدا حلوة ومتعوب عليها اتمنى تشوفها وتقراها وتستفاد منها
ومثل ما يكول ابو المثل العتاب على كد المحبة مو لو شلون ما ادري ما حافظة المثل زين
مشكورر اخونا على حرصك على المنتدى

[الفهــــــــــرر]

اولا اني اقدم شكري الى اخويه مستقيل والج انتي يا معماريه واشكركم على المرور
واني تره ما كلت للمعماريين لاتشعرون ولا تكتبون خواطر
لا بالعكس الشعر حلو الخواطر حلوه بس الي حبيت اوضحه ان كلشي اله مكانه
واني قبل من ادخل للمعماري اشوف مواضيع هوايه بس هاي الفتره جاي اشوف هوايه مواضيع ما تخص المعماري بشي صح لو مو صح

[مستقيل]

صح ومليون صح يا ورده واحنه نحي كل واحد يهتم بقسمنا وتسلم وكلك ذوق

[سارةالمعمارية]

اوكي سوري فهر الظاهر ضوجناك بمواضيعنه واذا على الكتابه بعد منكتب لان اذا حولنه المنتدى من منتدى معماري الى شي لاخ فاوكي سوري وخلاص حنفرغه بس للقسم المعماري مثل متكول بس مااعتقد التنويع بالمواضيع بيه اي اشكال او غلط

[المعمارييية]

يمعودة لا تزعلين ساروكي سور قصدي سارة حبيبتي والله ما تسوة ترة صح التنويع حلو بس المنتدى مال المعماري محطوط اكثر شي للمواضيع المعمارية صح اكو بين فترة وفترة واحد ينزل مواضيع وسوالف وانت ادرى انه اكو هواية تنوع بالمنتدى بس انت وضميرج مدا تلاحظين من وجهة نظرج المعمارية انه المنتدى صاير اول ما تقرين العناوين عبالك هوسة مو لو مومو؟؟ وحبي احنا المعماري متعودين على النقد فانت مو تزعلين مني لان هنا وبالحياة العادية الكل يعرف اني ما احب ازعل احد علي وسالي مستقيل والكل هنا والعتب على كد المحبة مو؟؟ لو شنو رايج؟؟؟اتمنى تتقبلين كلماتي برحابة صدر واتمنالج الموفقية

[Witness]

والله اعتقد هذاالي تكولة سارة يريحك عيني فهرر
وخلي يكون للعلم انوا احنا بالمنتدى واحد يعرف الثاني لهذا السبب احنا هنا
وميحتاج نشارك بغير مكان احنا يهمنا جماعتنا
لمتنا كقسم واحد
المهم مشكور ومنخيب ضنك بعد عيني فهرر
عبالي مسوين فد مشكلة من قريت الاسم

[الفهــــــــــرر]

شباب اني ما اريد ازعل واحد
وثانيا اني هذا الموضوع من نزلته خاص للمعماريين فقط وثالثا عيني ساره تره اني ما امنعج هي مجرد نصيحع الكم واني جاي اشوفها لمصلحت المنتدى مال معماري قبل كلشي واني اسف اذا ضوجت واحد
تحيااااااااااااااتي

[مستقيل]

حبي بالعكس والله ابد منضوجج وانت حبيب المعماريين ولتزعل من اي واحد وموضوعك على راسي حبي .......واذا اني عزيز عليك استمر بالمنتدى المعماري ولاتزعل من ساره انت ورده وساره ورده وكلكم منورين المنتدى زين حبي وتقبل مروري اخويه

[الناصر79]

السلام عليكم
اشونج اخويه الفهر ...؟
اتريد الصدك ..؟
يمكن المعماري هوه اكثر قسم بيه مشاركات نسبه الى تخصصه
لان بقيه المنتديات كله مشاركات العاب و غيرها ..!
هوه مو عيب ابد ...بس اعتقد قسمنه صار بيه مزج بنسبه صحيحه .. لان هذا المنتدى تابع لجامعه و ليس قسم هندسه معمارية وبس بالتالي اكو علاقات بين الاعضاء و صداقات ووقت للمرح ..
ما اعرف اذا افتهمتني اخي ...بس القصد انو قسمنه بيه مشاركات واعضاء ديبذلون جهد بمتابعه مواضيع عالميه وينقلونه اخبارهه مثل بغداد و اعضاء ديعملون سيريز معمارين و مدارس معمارية و اعضاءايسولنه سفرات يفرونه على العالم ونقاشاااات كومه اووو شحجيلك ... بس اخويه مو دفاعا عن القسم
بس اعتقد قسمنه صارت بيه نسبه الخلط الصحيحه للمواضيع و هاي النسبه مرات اتزيد مرات اتقل .. ومرات القسم ايحدق ههه بس سهلهه
وتسلم و اسف اذا طولت
تحياتي

[الناصر79]

اخي الفهر
راجع هذا الرابط الذي لم يحدث منذ فتره
وشوف كم المواضيع

مواضيع تهمك\بواسطة المشرف كرافي_واي (http://http://www.dijlh.net/forums/showthread.php?t=28614)::51::

[الفهــــــــــرر]

حبي بالعكس والله ابد منضوجج وانت حبيب المعماريين ولتزعل من اي واحد وموضوعك على راسي حبي .......واذا اني عزيز عليك استمر بالمنتدى المعماري ولاتزعل من ساره انت ورده وساره ورده وكلكم منورين المنتدى زين حبي وتقبل مروري اخويه


حبي اي جدا اشكرك على اخلاقك الحلوه
وتره احنه هنا كلنا اصدقاء واخوه ان شاء الله قبل كلشي وان شاء الله يستمر التواصل بينا
تحيااااااااااااااااااااااااااااااااااتي

[1983توتة]

هلو عيني فهرر شكرا للملاحظة
بس اعتقد ان كل شخص يكون حر بالموضوع اللي يضيفه وخصوصا المعماري لان مثل مكالوا اخواني ان العمارة ممكن ان تستلهما من بيت شعر او حكمة معينة وبما ان المعماري يحب التغيير ويكره الملل فاكيد راح ينوع بالمواضيع اللي يختارها .
ومشكوووووووووووووووور