روميو من جديد

[haidor]

السلام عليكم

اني مشكلتي مالها حل ..واي حل تطرحوه اعتقد ماراح يفيد لان مشكلتي مو صعبه بس القرار بيها صعب..خلي اعرفكم عن نفسي اني مهندس واشتغل بشركه محترمه وبراتب كل الشباب يحلمون بيه وحالتي الماديه توب التوب وباعتمادي عل نفسي...ومشكلتي انه خليت عيني على بينه من جنت بالكليه وطبعا البينه متسوي علاقات ولا اني احب اسوي علاقات من مال هالايام ويه البنات ..فقررت اني اتقدم الها وافض الموضوع هذا الحجي واني بصف ثاني كليه ..ولمن ردت اخطبها حسبت حساب اني بعدي طالب وموقفي حيكون ضعيف وخصوصا انه اني من النوع اللي يحب يعتمد على نفسه المهم هيه السالفه اصلا ما رهمت لانه وكعت بين الحجيه ( والدتي ) وهاي البينه ..ولان الحجيه قافله متريدها ولسبب استحي اكوله وهو انه شافتها بالحلم متصلح لي وانه راح تبهذلني وهاي السوالفه مال النسوان..وايمانا مني بفضل الابوين حاولت اشفت الموضوع لحد ما احاول اقناع الحجيه وباسلوب الزمن واالتفاهم...ومرت السنين واني احب هذه البنت ومن كل قلبي والشاهد الله نيتي صافيه ويايها..الى ان كان وقت التخرج وعملت في عده مكانات واخرها في مكان خارج بغداد ..وظنت البنت اني نسيتها ولكن لم استطع في لحظه ان انساها
وتخرجت البنت اللي تصغرني بسنتين وعاودت الاتصال بها عن طريق احد الزميلات ..وتاكدت بان البنت ايضا متعلقه بي تعلق مو طبيعي ..ولهذا اتصلت بها محاولا تبرير سبب تاخيري ورجوتها انتضاري لا رتب اموري.وبين هذا الكلام وذاك ارتكبت خطاء عمري وكنت اتصل بها يوميا ..وعل الاقل لمده ساعه وتفاهمنا على الزواج بادق تفاصيله من اثاث الى اسماء الاطفال الى الحفل ال كل هذه الاشياء وطبعا مكالمات مؤدبه جدا بعيده عن الرذيله
وبعد ان جمعت المال الكافي واشتريت سياره من مالي الخاص وقطعه ارض وجمعت مال للزواج وللاثاث..وبهذا الوقت شعرت باني مؤهلا لان اكون زوج وان اكون على قدر هذه المسؤؤليه..حاولت ان اتقدم اليها ...ولكني واجهت رفض والدتي مره اخرى وللاسباب التافهه التي لايرضى بها شرع الله ..ولكوني اخاف على والدتي لانها مريضه بامراض مزمنه ( ضغط + سكر ) وكذلك خوفا على شعورها..ومن جهه اخاف على نفسي لاني بصراحه لا استطيع الزواج من بنت اخرى وخوفا على هذه البنت البريئه والتي تعلقت بي تعلقا مو طبيعي..وقعت بالمشكله العوصيه..ولهذا قسوت على نفسي وعلى البنت ..وطلبت من البنت ان نفترق..وطبعا ما اكلكم وضعيتي بالشغل تخربطت والبنيه ما ادري شصار بيها...وصدكوني مو نقص رجوله من ولكني اخاف على الوالده واحبها جدا..اتخذت القرار وقررت البحث عن بنت باختيار الوالده وجلبت الكثير وخصوصا بانني على كولت ربعنه كامل مواصفات ولكني لم اكن الموده لاي واحده منهم ولهذا رفضتهم..وبقيت وسابقى اتذكر هذه البنت...وانا الان محتار جدااااااا ووضعيتي زفت ..والكثير من الاصدقاء يعرفون بالمشكله ..فمنهم يقل ابتعد احسن والبعض يقول: تزوجها وخلي الوالده ترضه بالامر الواقع ( يعني اسوي اللي يسوه بالمدبلجات ) هذا طبعا اهلها اذا انطوني اياها اذا رحت الهم وحدي بلا اهلي

تحياتي ..كتبت لكم لاني مالكيت واحد احجيله كل اللي بكلبي....هذا المختصر ومالم يذكر كان اعظم
اخوكم

[حــــــورية أيطاليـا]

::27:: ::27:: ::27:: ::27::
اخ حيدور والله مشكلتك تقهر
انت حقك لان رضا الاهل هو من رضا الله
لكن انت المفروض ان تقنع الوالدة من الاول
لان ميصير تستمر بعلاقتك وية البنية وتالي تعوفهة شنو ذنبهة((سودة عليه::27:: ))
اذا البنية خوش وحده وبنت عائلة ما اعتقد ان الوالده ترفض لكن اذا عدهة وجهة
نظر خاصة بيهة اعتقد لازم تتفاهمون عليهة,,وكل ام تحب مصلحة ابنهة اكيد
بس انت هسة مشكلتك راح تبقى وياك لان انت حبيت من كل قلبك
وهذا من حقك ,,, بس ارجع واكول ((شنو ذنب المسكينه الي تعلقت بيك::27:: ))
والله لو تحاول وية الحجية اكثر من مرة وتحاول تبينلهة وجهت نظرك
وكل الصفات الي بالبنية
والله كريم شنكلك بعد
ان شالله الاعضاء البقية يجون ويحلولك مشكلتك اكثر
...

[حب مع الايام]

والله يا اخ حيدر مشكلتك تحطم الكلب
بس اني اكول شوف منو اكو شخص عزيز على كلب امك ودخله بالموضوع يعني مثلا خالتك امك كلش تحبها وتكدر تلينها على البنيه هيجي قصدي وانت هم ابقى حاول وخلي هوايه اشخاص يصيرون وياك بلكت امك من تشوف اكو هوايه ناس مقتنعين بيها تكدر تغير موقفها واذا اهلك كلهم يوافقون خليهم يحجون وياها
واني ما اتصور اكو ام تحاول تحطم كلب ابنها لان انته تحبها ومن كلامك حبك كلش قوي للبنيه يعني ما راح تكدر تنساها بيوم وليله يعني تفهم امك انك تريد البنيه ولا تغير بكلامك كل يوم حتى امك تفكر انوا انته شلت الموضوع من راسك
والله اتمنى انوا تنتهي مشكلتك على خير
ومااكول غير انشاله تنتهي...

[ابو سموسة]

حيدوري ابو كرار
هاي انتة واكع بيد الحجية
يعني دمار شامل ههههه
اكولك انتة من هسه خلي ببالك انو هاي البنيه الك تدري ليش
لان ماكو شي ترة سهل و انتة من حجيك وادكول حياتك الشباب يتمنوها يعني حياتك سهلة صايرة فلازم شي يجي بيها صعب و (( المؤمن مبتلى)) فانتة الشي الي تريده بشده راح يكون صعب وهاي الحياة طبعا هيجي

فانتة شتسوي اول شي تقنع الحجي بكل الاساليب والطرق وكولها اني ما ازوج غيرها قافل نهائيا حتى لو تضل بله زواج
وثانيا اذا اهل البنيه يعرفوك و عدهم ثقة بيك روح جيب البنيه واخذها لامك وكعدها يمها فد يوم و سوالف وخلي تتعرف عليها وتشوفها وترة انتة تعرف النسوان وسوالفها يعني امك حلمت بالبنيه ترة راح تشلع كلبك لحد لمن تاخذها بس بالاخير تاخذها ان شاء الله
فانتة لا ترخى خليك صابر واصبر على الحجية حتى لو تطول الشغله بس خلي شوية صبر كتلك مو سهلة هاي شغله زواج
وشغله لخ مثل مكالت او مكال حب مع الايام جيب وين اكو عزيز على كلب امك وخلي يحجي وياها شوية شوية هسه تقبل
وان شاء الله يا رب خير


وكولنا عود شراح يصير

[haidor]

مشكورين اخواني عل المشاركات..بس صدكوني اني محاول بشتى الطرق ويه الحجيه واكثر من مره لحيت وياها تخربطت ولكيتها بالمستشفى...ولمده اربع سنوات حرت شسويت ..اقنع الحجي ارجع وره فترهالكاه هو هم كالب عليه مع العلم اني هسه اشتغل بالشمال ..واهلي في بغداد ..والبنيه واهلها من وره الوضع لامني صدفه اجوي لنفس المنطقه اللي اشتغل بيها..وبدون ميعرفون اني هنا اصلا ...وهاي زودت لي القهر بحيث كمت اشوفها بالسوق لو بالشارع لو بالمطعم... وطبعا بكثر ما احبها دا احس بالذنب لان ادري اني هسه دمرتها للبنيه... اما بخصوص اقرب انسان للحجيه خالتي وخالتي هيه يمكن راس البله ..لان مبقيه بتها الا اليه...ومن اويدها لامي راح ....... السالفه...
واني اصلا هم متخوف من علاقتهم اثنينناتهم ( البنيه والحجي ) لان بسبب هاي الشغلات صار اكو كره موطبيعي بيناتهم وتعرفون هيه بلا اي كره تعلك المشاكل مو النوب بها الوضعيه التعبانه

المهم اشكركم على الردود ..وما اريد منكم غير بس الدعاء

[ابو سموسة]

مشكورين اخواني عل المشاركات..بس صدكوني اني محاول بشتى الطرق ويه الحجيه واكثر من مره لحيت وياها تخربطت ولكيتها بالمستشفى...ولمده اربع سنوات حرت شسويت ..اقنع الحجي ارجع وره فترهالكاه هو هم كالب عليه مع العلم اني هسه اشتغل بالشمال ..واهلي في بغداد ..والبنيه واهلها من وره الوضع لامني صدفه اجوي لنفس المنطقه اللي اشتغل بيها..وبدون ميعرفون اني هنا اصلا ...وهاي زودت لي القهر بحيث كمت اشوفها بالسوق لو بالشارع لو بالمطعم... وطبعا بكثر ما احبها دا احس بالذنب لان ادري اني هسه دمرتها للبنيه... اما بخصوص اقرب انسان للحجيه خالتي وخالتي هيه يمكن راس البله ..لان مبقيه بتها الا اليه...ومن اويدها لامي راح ....... السالفه...
واني اصلا هم متخوف من علاقتهم اثنينناتهم ( البنيه والحجي ) لان بسبب هاي الشغلات صار اكو كره موطبيعي بيناتهم وتعرفون هيه بلا اي كره تعلك المشاكل مو النوب بها الوضعيه التعبانه

المهم اشكركم على الردود ..وما اريد منكم غير بس الدعاء


اكولك سبحان الله انتة ليش تاخذها انو تحسسك بالذنب بالعكس اصلا شوفها انو الله ديقربكم
و شغله لخ مو كلنا خالتك كلنا كمثال اقرب انسانه لامك انتة ليش رحت على خالتك حتى لو صديقتها او ابوك مثلا او احد من كرايبكم


والغي سالفة الحجية والبنيه يحجون
وهيه لو تصفنلها ماكو الها حل تشوفها
بس وعيونك مدام انتة ماشي عدل ويا البنيه اني اكولك تتزوجون
واكولك انتظر عسى لو منا لمليون سنة
و الحل تنتظر وتصبر ماكو غير حل
وكول يا الله

[ارق احساس]

السلام عليكم ورحمة الله و بركاته
بارك الله في حبك النقي اخويا والحب على طول مصدر قوه
ومثل مقالوا الاخوه اصبر وظل حاول مع الوالده ولا تستسلم ابدا
وان شاء الله تتحقق الاحلام
المستقبل ملك للذين لديهم احلام جميله

[haidor]

تحياتي للجميع ةشمرا على هالكلمات الحلوه للي بصراحه خلتني احس اني اني فعلا احجي ويه اخوتي...وكل ما اقوله :::يالله يار ارحم الراحمين ارحمنا برحمتك واهدينا الى القرار السليم

اخوكم

[ارق احساس]

اخويا هذا افضل القول والله فاذا الله معك من سيقوى عليك طبعا لا احد

[جنـون]

كلها كوم وسبب الرفض كوم ثاني... !
زين شافتهه بالحلم..يعني شنو..والله هاي خوش يا اخ حيدر..الافضل منحلم احسن على هيجي حساب !

شوف اذا انتا رحت للبنيه وخطبتها..وكلت ال اهلها سبب عدم وجود اهلك وياك ايجوز يعذروك..

بعدين انتا ليش متحجي ويا اخوها او اختها ؟ تحجيلهم الفلم شنو ؟
هاي من ناحيه البنيه..

زين امك..جيب شخص اياثر عليها..
اقنعها تره الاحلام لا شيئ..
حاول ويا عم او خال خلي يدخلون وسيط وانتا هم حاول تحجي وياها حجي منطقي..كللها انهوو انتا اتحبها الهاي البنيه ومتكدر بدونها..
صدكني اذا اتحبها من صدك..وتتركها لهذا السبب هي رح تتعقد ..وانتا مرح اتكون سعيد لانهو قلبك ويا غيره وحده..وبتالي الي رح تتزوجها احتماليه انهو اتظلمها وياك..؟

هوايه ناس تره واجهو هيجي مواقف..بسبب سبب الرفض كلش اقوه واخر شي اتزوجو..
ابقى حاول ودك على الحديد علمن ايلين !

وشغله لخي..ليش متعرف البنيه على امك ؟؟؟؟؟ ايجوز يم اتشوفها اتغير رايها ؟


ننتظرك..
:
:
جنونه

[pharma]

الله يساعدك يا اخي الواحد مايعرف منين تطلع له مشكلة
يااااااااارب تنحل المشكلة ويصير كل شي تمام وتفرح ياااااااااااااارب
ويوفقك ويارب تصير امورك كلها مضبوطة والحجية تقبل بس نصيحة مني لاتتزوج غصب عنك اي وحدة ابدا الا تكون مقتنع بها هاي حياتك مو لعبة لاتخلي احد يدمرها باي شكل..........لاقدر الله
ان شاءالله بالتوفيق يارب مع الي تريدها

[بنوتة عراقية]

ما اكول بس الله يساعدك ويساعدها...بس ارجوا ان تحل القضية بسرعة بمعرفتك قبل ما تنخطب البنية وتصير القضية اكبر..

[LARAH]

مرحبا أخ حيدر..
ان شاء الله تكون بخير وصحة دائمة وربي يساعدك على محنتك
لأنها ترهق الأعصاب ...ندعيلك بالفرج..

بصراحة أخ حيدر ذكّر الحجية بأنه حرام تمنع زواجك من هذي البنوتة
لأن هذي حياتك وأنتَ مسؤل عنها..يكفي البنوته صاحبة أخلاق والأكثر
هي تحبك..وإذا كانت تملك دين فصدقني راح تكون حياتك أشبه بالمثالية
لأنه تعرف حدود رب العالمين..وإذا جبرتك والدتك على شي ماتوافقها فيه

فذّكرها إنه حرام عليها وتتعاقب عليه عند رب العالمين
ومدامها حجية لازم تقدرهذا بغية إرضاء ربها..

اما بالنسبه الك مو حرام اذا عارضت والدتك وهذا
الأمريحتاج منك قوة..أستخدم اسلوب الرقة واذا
مصارتلك نتيجة لازم تفرض رأيك..وأكيد بمرور
الوقت راح تستلم للواقع ..وخالتك قوللها انك
مراح تتزوج اي بنت غيرها ..وإذا فرضتوا
هذا الشي بالأجبار يعني أدمر حياة الأنسانة
اللي راح ترتبط بيها مندون موافقة

كوللها تشيل هذي الفكرة من دماغها نهائياً
ولاتسمح لأحد يتدخل في حياتك الخاصة
ولاتضيع البنوته من إيدك ..أبقى وياها
حتى تفرج ومدام تحبون بعضكم ان شاء
الله تفرج..(والله تقهرني هذي القصص)

كون على يقين إذا أمتلكت البنوته دين لاتخاف على اللي
راح تقدم عليه لأن ربي راح يوفقكم بزواجكم.

اتمنالك الفرج ..وخبرنا شو اللي يصير وياك
ان شاء الله نسمع الأخبار الحلوة.

بكل المنى والتقدير تقبل تحياتي.

[زهرة القرنفل]

السلام عليكم اولا .اخي ممكن ترتب لقاء بين هذه البنت ووالدتك على الاقل حتى تقتنع والدتك بيها ولاتحكم عليها بدون معرفة دقيقة ومو شرط تكون الوالدة لها علم مسبق بان الفتاة قادمة اجعلها مفاجئة مثلا ودع الفتاة تظهر حسن نواياهالها واني متأكدة لو كانت تحبك البنت راح تعرف شلون تدخل لقلب والدتك واذا مكانت شايفتها يفضل ان تكسب قلبها بعدين تعرف منو هيه اما اذا مو ممكن انه يدبر لقاء فحاول انت ان توثق العلاقة بين الفتاة وبين والدتك بين فترة واخرى اخبر والدتك انها تسلم عليها مثلا او قالت بحقها كذا عبارة مدح او حتى اجعلها ترسل لها الهداية مباشرة او عن طريقك حاول ان تفكر كيف تقرب بينهما.

[نوره الحب]

انت غلطت غلطه جبيره بحق البنيه بقطع العلاقه بيها هاي فوك ماتحملتك كل هاي المده؟؟؟؟
لتصير ضعيف محد يفيدك روح اتزوجها واللي يصير خلي يصير
امك اكيد حنينه مارح تتبرى منك رح تزعل شويه وتالي تحن عليك و تصالحك لتضيع البنيه من ايدك