كافي قتل ..يارب والله بعد مااتحمل اليأس قتلني

[سجّاد البصراوي]

السلامُ عليكم قبل ان اعقّب ع الموضوع احببت ان اُهنئكِ على الطرح الرائع والراقي
للموضوع واختيار المُفردات الاليمة حقيقة الامر لما يمّر بهِ عراقنا الحبيب
والذي لا نملك حياله غير قول اللهم اجلِ هذهِ الغمّة عن هذهِ الامّة بحِق مُحمّد والهِ الاطهار ..
لقد تألبوا على العراق مِن كُل حَدَب وصوب منهم السعودي
ومنهم الكويتي ومنهم اليمني ومن الافغاني
ومنهم العراقي الذي لا يستحق ان يُطلق عليه هذا الاسم
لكن للأسم اشتروا النفوس والضمائر الميّته ..
لكَ اللهُ يا عراق .. لك الله يا مُحطّ انضارِ خلق الله ........
سلمتِ وهنيئاً لقلمِ يعتصرهُ بنانكِ لكِ اعطر التحايا وارقها
وتقبّلي مروري المتواضع
.

.

.

سجـّاد


مُلاحضة / كتبت باللون الاسود لأن الموضوع
لا يتوافق معَ اي لون غير الذي كُتب بهِ

[لؤلؤة العراق]

http://www.6rb4up.com/uploads/4fd1ed5fe1.gif



حياتي مثل هالناس كنت عايشتها بحلوها وبمرها

كان كل همي الدراسه والمستقبل وطموحي الصغيره بين ايديه

حققت حلمي رغم الضروف الصعبه..

فجأة كل شي تغير..غيمة سودا مرت علينا ...بغداد سقطت

جرحى وقتلى بالملايين..تهجير بالملايين اخل القطر وخارجه

زوجات ترملت وهي بربيع عمرها...اطفال انقتلو وهم برحم امهاتهم

ماشافو النور..ولاعرفوا حلاوة ومرارة الدنيا..استقبلهم رصاصات الغدر

انحرمنا من ابسط خدمات المعيشيه...

اكبر دوله بالمنتوجات النفطيه نعاني من نقصان حاد بالمنتوجات النفطيه والكهرباء

الله اكبر وين وصلنا...بلد الرافدين دجله وفرات نعاني من قلة الماي..وين صايره؟؟

خيرات بلدنا دتنهب..ارضنا انسلبت من عروبيتها...

كل هذا وكلنا ميخالف..عراق راح يرجع ..الله كريم..ماعدنا الا الصبر

صرت اكره التلفزيون والاخبار....امسك الريموند وادوس على قنوات الاخبار والخوف يعشعش داخلي

خوفي من قتل وجرحى ومناضر مأساويه اكثر...وكالعاده اخبار اليوم اكثر قساوة من البارحه

يسألوني اهلي شخبار اليوم؟؟

ارفع راسي ليفوك اداري دمعه تريد تنفجر وتنزل بحرارة تذوب الثلج والصخر

مااكدر ارد عليهم ..احس بخنقه وببحه صوت اللي تريد تبجي مثل الطفل

http://www.6rb4up.com/uploads/d288ee88a9.jpg


صرت اتمنى وكت الصلاة ييجي بسرعه ..اشكي لرب العالمين اللي ديصير

اسجدله وقلبي منتلي هموم ماتتحملها الجبال...ايديه ترتعش من حاضرنا

صرت اتمنى ييجي الليل اخلي راسي على مخدتي واسمح لدموعي تنزل وتشتكي

اخبي صوتي اللي تريد تصرخ بقوه ليش كل هذا ياربي ؟؟اخبيها بدموعي

ليش صرت احس ان الدموع هي المخرج الوحيد للعراقين؟؟

صرت اخاف لاييجي يوم دموعي تجف ..ابكي بلادموع http://www.6rb4up.com/uploads/16fb90cd7f.gif

ليش صاروا العراقين يبينون القوه والضحكه بالنهار

ومايسمحون للدمعه تبين الا بعيد عن الناس؟؟صارت طقس من طقوس العراقين

ليش احنا شمسويين حتى كل هذا يكون مصيرنا؟؟

ليش..؟؟ليش؟؟ليش؟؟


شصاير بالدنيا؟؟

الامل مات بداخلي..وترسب المأساة بين ضلوعي..

احس قلبي كل يوم يريد يطلع من بين ضلوعي وغصب عنه ارجعه بمكانه

ليش صرت احس بالموت مية مره باليوم..روحي ذبلت ..قلبي اختنق



صرت كل يوم اباوع على اهلي واحد واحد خوفي افقد واحد منهم..الله لايقدر

قلبي عليج يمه ...شلون تنتضرين اولادج يرجعون من المدرسه وگلبج يحترگ من الخوف

قلبي عليك يايابا...شلون متحمل كل هذا


قلبي عليك يانفسي..داكذب عليج بالنهار ارسم ضحكات وابتسامه

واداري بين هالضحكه دموعي واهاتي ...

قلبي عليك يالعراق حتى الاساتذه والمثقفين انقتلوا


قلبي عليج ياام الشهيد.ياللي ربيت ابنائج بحنيه وخوف

http://www.6rb4up.com/uploads/efbbf483b2.jpg

حملوا كل احلاهم الصغيره وراحو يتعلمون ويرفعون راس البلد بشهاداتهم

قتلوا احلامكم الصغيره..ضاع المستقبل برحيلكم..قلبي عليك يالطالب

ابسط احلامك ماتت وياك ..قتلوك بغدر وبجهل..اويلي عليك يالبلد

كل شي بالمدرسه والكليه تبجي وراكم.


http://www.6rb4up.com/uploads/1731a1dcdf.gif

.الابواب كانت تنتضر يمر من يمها عراقي رافع راسه

الشبابيك كانت تتباهى بالطلاب وهم يتفرجون على مستقبلهم..

الصبوره بعد مااكو ايد بطل يرسم مستقبله على الصبوره الصغيره

لكرسي راح تفتقد بطل راح شهيد ..كل ذنبه كان عنده حلم صغير

كل ذنبه اسمه عـــــــــــــــــــــراقــــــــــــــــــي

كل ذنبه ابن الرافـــــــــــــدين

الخاطر الله كافي..


كاااااااافــــــــــــــي

صرنا دنعيش ببلدنا بغربه..داحس بغربه ببلدي وين صايرة؟؟

ارض العراق ديصرخ بصوت عالي كافي تدفنون بين اضلاعي جثث شهداء ابرياء

سماء العراق بطلت تمطر دموعها جفت بعد ماتتحمل كل هذا القساوة والضلم

دجلة والفرات تحولوا لنهرين من الدماء...الله عليك يالزمن

كااافي


كااافــــــــــــــــــي


كافــــــــــــــي ضلم وقتل ..والله ملينا

دكاافي والله بعد ماانگدر على كل هذا

خلاص حتى المستقبل كرهته...اليأس سيطر عالموقف

مااريد اشوف مستقبل اسود مخلوط بدماء شبابنا واطفالنا ورجالنا ونسائنا

حاضري اقتلع كل قطره امل بداخلي وتركه صحراء بس ينسمع منه صوت العواصف

http://i10.tinypic.com/2vd5v0p.jpg

صرت اتمنى الموت قبل لا اشوف العراق خلص ضايع تايه


كااافي

اتأسف لاوراقي ياللي دموعي كتبت معاناتي

ياا الله الشكوى بس الك يارب

يارب انت اعلم بحالنا يارب

ارحمنا برحمتك يارب

[اســــــ الرافــدين ــــد]

والله الف سكر على هذا الموضوع صرنة غربة بوطنة بس الله كريم انشاء الله يرجع العراق مثل قبل واحسن مثل كولت ابو المثل تفائلو بالخير تجدونه

[لؤلؤة العراق]

اخيي الغالي


اسد الرافدين

شاكره تواجدك العطر


ربي يسمع منك


دمت بخ ــ،ــير

[CIVILIAN_CAT]

شكرا لؤلؤه على الموضوع الرائع
وان شاء الله الوضع يتغير والعراق يرجع احسن من الاول
وينتهي قتل الابرياء ونرجع كلنا للوطن
تحياتي الج

["♥" ZoZtY "♥"]

حبيبتي لؤلؤة موضوع جميل
ولكن للاسف العراق هيج صار بيه وهاي كل يوم تنعاد نفس الشي
بس نقول ياربي يرجع العراق مثل قبل ويصير الوضع زين
ابدعتي ياعزيزتي
تحياتي

[زهرة الحياة]

مشكوره حبيبتي لؤلؤة على الموضوع
وان شاء الله يرجع بلدنا مثل ماكان وبعد احسن

[محمد العبيدي 1]

يسلمو على الموضوع
وانشاء الله يرجع العراق وتزول الغيمه على العراقين
تقبل مروري

[مقاوم من العراق]

يسألوني اهلي شخبار اليوم؟؟

ارفع راسي ليفوك اداري دمعه تريد تنفجر وتنزل بحرارة تذوب الثلج والصخر

مااكدر ارد عليهم ..احس بخنقه وببحه صوت اللي تريد تبجي مثل الطفل
...................................
النة الله

[SoLeDaD]

::27:: ::27:: ::27:: ::27:: ::27:: ::27::

والله كلامج يذكرنا بمعاناتنا اليوميه لؤلؤة ::27::

[TaMaRa]

والله يا لؤلؤة عيوني بجن من قريت موضوعج ::27:: ::27:: ::27::
واني هسة من الناس الي خايفين بكل دقيقة اخاف من الباجر واخاف من كلشي
مستقبلي مهدد بأي لحظة مااعرف شنو الي راح يصير واني الي بانيه آمال على ان
ابني نفسي واريد الشهادة وهذا شيء مهم كلش بالنسبة الي افرح اهلي واكون شخصيتي
وحياتي بس مع كل الأسف تزامنت هاي الظروف الصعبة ويا الوكت الي بيه اني احلم من زمان..ماكو غير نحمد الله ونطلب منه الرحمة ويساعدنا على ان نتغلب على كل هاي الظروف الصعبة..
اشكرج هواية يا لؤلؤة الغالية على احساسج الجميل والحزين وهذا يدل
على شخصج الرقيق..
لكِ خالص تقديري