شنو اخبار الجامعة اليوم؟؟ و مدى صحة هذا الخبر

[طب الانبار]

السلام عليكم و حمة الله و بركاته
شلونكم شباب و بنات الجامعة
هسه سمعت خبر يكول بانه صاير انفجار بالسيطرة مال الجامعة ؟؟؟ صحيح هذا الخبر لو لا؟؟ اتمنى اعرف التفاصيل و الله يحفظ كل طلاب و طالبات جامعة الانبار و كل الجامعات...
تحياتي

[Mus6afa]

والله ماأعرف؟!!
بس ان شاء الله ماكو غير الســلامة ..

[eng_hym]

صار انفجار بس الحمد لله محد تاذى والله يحفظ الجميع ان شاء الله
والدوام عادي والانفجار بعيد عن الكليات لان صار بالسيطره

[نجمة الصباح]

هلو شنو هذاالخبر صحيح اني اليوم داومت بس طلعت 10 ونص من الجامعة وراة ما ادري اذا صار هيج شي على كلن ان شاء الله ماكو شي ومحد متاذي
ومشكور على الخبر

[جروحي الشرير]

يا ربي مرت بسلامات
وما متاذي احداني والله نزلت لراوة البارحة الاحد وما ادري
ان شاء الله ماكو شي لان السيطرة بعيدة كلش على الكليات

[rafidain]

الحمد لله الانفجار صار بوكت محد موجود بالسيطرة
الي تصوبو 3 شرطة بس محد مات بيهم والطلاب كلهم بخير والحمد لله
هذا الي سمعناه والي شفناه من طلعنا

[نور-طب الانبار]

الصراحه اني مسمعت هيج شي لان اليوم اخويه ممداوم بالجامعه لان رجع للبيت اليوم
بس اخي(طب الانبار)شنو اخبار كلية الطب ؟داومتو هذا الاسبوع لولا؟لانه اني نزلت لاهلي من الاربعاء
فما اعرف كلشي عن الكليه .واذا تعرف اي خبر عن الدوام بالطب ياريت تبلغنه
والله يسهل للجميع....

[أنـ إمبراطور ـا]

السلام عليكم **اي صار انفجار بسيطرة وتصوب طالب من الصوفية مع الاسف بس جروحة مو خطيرة ونتمنا له الشفاء العاجل ان شاء الله::27::

[هاكر العلوم]

السلام عليكم الى الاخوان صحيح اليوم حدث انفجار في الساعة 11 صباحا وقام احد الاشخاص بتفجير نفسه على الشرطة مما ادى الى مقتل ثلاثة من الشرطة وجرح طالبين ويقال ان احد الطلاب اصابته خطيرة او مات (اوكد على كلمة يقال) واكد احد افراد الشرطة ان الذي فجر نفسه من مواليد 1985 والله اعلم

[جارح العراقي]

ليش يااااااا اهل الرمادي هذاااا الي يصير لازم تكونون ايد وحده مع الشرطة ترى والله ماكو احسن من النظام والامان طلاب لازم تصيرون ايد وحده ضد هذوله وتوكفون ويه الشرطة ترى والله هذااا كله مايفيد والله يرحم الشهداااااء الي راحم والله يشفي المصابين

تقبلوووو احترامي
جارح العراقي

[الكبيسي99]

الانفجار حدث قبل الساعة 11 بوقت كثير , والاصابة مقتل شرطي واحد و اكو اصابة بعض الطلابة ولكنها خفيفة كلها ان شاء الله و كان اصابة واحدة مهنم ليست خطيرة لكن اكثر من الاخرين

[جروحي الشرير]

الحمدلله على كل حال
ونتمنى الشفاء العاجل للمصابين
وان شاء الله ما تتكر بعد

[سكون الليل]

اي صحيح اني شفت باقايا جثة الي قام بالعميله وحتى اني كنت قريبه من الانفجار نوعا ما

بس بالنسبه لعدد المصابين والقتلى ما اعرف

وحدث الانفجار في وقت كان الطلبه بعيدين بيه عن السيطره

وان شاء الله ما تتكرر هاي العمليات مرة ثانيه

[ابو التاريخ]

صحيح الانفجار صار 10:30 بالضبط وقتل بهذه العملية الضابط النقيب اللي جان واكف وشرطي وياه ويكولون انصاب طالبين واستاذ .
والله اعلم محد جان موجود حتى يعرف الصحيح.
تحياتي

[المجهول]

السلام عليكم
خبر مؤسف
بس لا ياثر على الدوام وعلى دخول وخروج الطلاب من والى الجامعه

[طب الانبار]

تحياتي الكم جميعا وبارك الله بيكم على ردودكم و توضيحكم للموضوع... و ان شاء الله الله يحفظ كل الطلاب و الناس اجمعين .. ونسال الله الشفاء لاخوتنا الجرحى من الطلبة .. اللهم امين
بالنسبة لاختي نور-طب الانبار ... الدوام بكليتنا هذا الاسبوع ما صار لان تدرين وضع المدينة بالداخل بس بالنسبة لمرحلتكم و الله ما عندي علم بس اعتقد هم ماكو محاضرات يجوز فد اشياء بسيطة و قليلة لان الكلية فارغة.. و اني حاظر.. تحياتي