المساعد الشخصي الرقمي

مشاهدة النسخة كاملة : هام الى جميع المبرمجين كلمن يدخل و يكتب سيرت حياتة البرمجيه حتى لو صغيرونه


DELTA logo

تتبع العربات والاشخاص عبر نظام GPS

خصم 20% احمي سيارتك وتابع لحظة بلحظة

www.dijlh.com


Helix
10-16-2008, 04:21 PM
السلام عليكم شلونكم شباب شلونكم بنات

اجتني فكره كلش حلوة انو نسوي كروبات برمجيه مختصه كل كروب بمجال عمل معين و حتى نساعد على تطوير مواهبنه و عمل برامج جميله متكامله مو كلمن يسويله برنامج وحده........
و بعدين تجيكم باقي التفاصيل

بس اول شي حتى نترتب في مجموعات خلي كلمن يحط سيرته الذاتيه البرمجيه من اول ما بده و شنو اللغات الي يعرفه و كل لغه شكد مارسه و اذا جان لساعه يشتغل بيه لو لا و شنو اكثر لغه متمكن منه و كل لغه شنو الدعافيس الي يعرفه بي أكيد ماكو احد مختص بكل مجالات البرمجه في اللغه الواحده.

ارجو المشاركة من جميع المبرمجين مع خالص تمنياتي لكم بالتوفيق و الموفقية و الأتفاق

Helix
10-16-2008, 05:16 PM
مرحبا اخوني و اخواتي هاي سيرتي الذاتيه البرمجيه.

اول شي ابرمج من كان عمري 10 سنوات (يعني من الخامس ابتدائي) على الصخر اذا احد سامع بي

اول ما بديت ابرمج على برنامج البيسك ضليت الى حد الثالث متوسط صارت عدي خلفيه برمجيه اعرف شنو اكو ماكو علما جنت اسوي دساكت اوتو ران و اسوي رسوم متحركه بسيطه يعني هيج دعافيس مال عمر صغير

الى ان بعدين اجتي البنتيوم تركت البرمجه و رجعتله بالعطله الي وره السادس بكلوريا و بديت بال فجول بيسك السادس و تعلمته بالصيف و سويت عددت مشاريع صغيرونه الى ان سويت مشروع شويه جبير الي جان اول واحد بالنسبه الي سويت لعبه بالأمتحنات مال كليه (الواهس يجي ويا الدراسه و الأمتحانات) و جانت لعبه بسيطه بس طولت بيه 4 تشهر و صار اكثر من 1500 كود كبدايه المهم اشتغلت على الفجول بيسك السادس تقريبا 4 سنوات

و راها بلشت بال فجول بيسك دوت نيت 2005 اول ما نزل و ما كان عليه كتب ف أضطريت ادرسه من الأم أس دي ان بس عادي ما صارت عدي ذيج المشاكل لأن بديت افتهم و اعرف شلون اقره و ضليت بي الى حد 2007 و شتغلت بي برامج مختلفه و هم اتعلمت اسلوب الشغل هسه المهم الي اعرفه بي هو البرمجه العاديه المتعارفه و الكلاسات و شولن اسوي DLL فايل (حتى استخدمه بغير لغه برمجة) و راها بال 2007 رحت على الكليه جديده (تهجولت) و علمونه بيه السي (جنت كلش اكره لأن جانو اصدقائي يخرعوني منه و اني اكره الأقواس الي بي) شفته فيكه و دعافيسه اكثر عرفت بي كل السوالف و اسوي الهدر فايل عادي و استخدمت بي الهدر فايل مالت OpenGL و سويت بي تصاميم 3D و تحكم من الكيبورد و هاكم هاي مشروع اخر السنه بي سويت شعار ثري دي للجامعه

http://www9.0zz0.com/2008/10/16/12/902997766.jpg



و بعدين اول ما اجت العطله بلشت بال C#.Net 2005 و كلش سهل لأن اني مشتغل VB.Net 2005 و C و هو يملك دعافيس الثنين يعني تقريبا رأسا انطلقت بي و اشتغلت بي على الدايركت اكس و سويت Map Editor بس بعده مو كامل و هنا عرفت شلون اسوي اكسس على كارت الشاشه وشلون اقرر انو كارت الشاشه مناسب الى هاي اللعبه الي دا اسويه لو لا
هاكم الصوره ال Map Editor

http://www8.0zz0.com/2008/10/16/13/834555398.jpg


و اخر شي اشتغلت شويه بال XNA هم على ال C#.Net 2005 و الي هو خاص برمجة الألعاب التودي و الثريدي على الحاسبه و XBOX 360 و هاي صورة لعبه تودي من درس اتعلمته

http://www7.0zz0.com/2008/10/16/13/369964448.jpg



هسه الي اني اللغه الي مواضب عليهه كلش هي الـ C#.Net 2005 اما الVB.Net 2005 بس صارلي تقريبا 6 تشهر عايف يعني ما ناسي شي منه

هسه الي اعرفه بصوره عامه كأدوات و أوامر هو
If, Loop,................etc
function و دعافيسه
Struct
Classes
DX
XNA
OpenGL
و شلون اشغل الصوطيات ال WAV,MP3
و شولن اخلي برنامجي شتغل عدد من المرات و يطفه(KeyGen) شويه اعرف بالرجستري شولن احط و امسح و اجيك و اجيب و اودي


.
.
.
تحياتو

مذكرات حزينه
10-16-2008, 05:19 PM
هلااااااااااااااااو
شكرا على الفكرة كلش حلوة
طبعا اني نص مبرمجة ما محسوبه عليكم
بعدني ما متخرجه وما مبرمجه فد تطبيق كامل يكون فعال واكدر انشره
احب البرمجه هواااااااااي واحب لغة فيجوال بيسك اكثر من اي لغة واتمنى استفاد من خبراتكم
درست سي بلس بلس وفيجوال فوكس برو ولغة اسيمبلي واس كيو ال ولغة فيجوال بيسك
واتمنى اكون مثل حضراتكم وانزل برنامج اني مشتغلته من الالف الى الياء
وطريق الالف ميل يبدأ بخطوه
اني الاولى على فرعي لكن الكل يكول انه مو شرط الشاطر بأختصاصه يكون مبرمج محترف بالمستقبل::29::::29::

مذكرات حزينه
10-16-2008, 05:27 PM
مرحبا اخوني و اخواتي هاي سيرتي الذاتيه البرمجيه.



اول شي ابرمج من كان عمري 10 سنوات (يعني من الخامس ابتدائي) على الصخر اذا احد سامع بي


.

تحياتو



امممممممممم ماشاء الله ,الله هم صلي على محمد وعلى ال محمد ::45::

Helix
10-16-2008, 05:33 PM
هلااااااااااااااااو
شكرا على الفكرة كلش حلوة
طبعا اني نص مبرمجة ما محسوبه عليكم
بعدني ما متخرجه وما مبرمجه فد تطبيق كامل يكون فعال واكدر انشره
احب البرمجه هواااااااااي واحب لغة فيجوال بيسك اكثر من اي لغة واتمنى استفاد من خبراتكم
درست سي بلس بلس وفيجوال فوكس برو ولغة اسيمبلي واس كيو ال ولغة فيجوال بيسك
واتمنى اكون مثل حضراتكم وانزل برنامج اني مشتغلته من الالف الى الياء
وطريق الالف ميل يبدأ بخطوه
اني الاولى على فرعي لكن الكل يكول انه مو شرط الشاطر بأختصاصه يكون مبرمج محترف بالمستقبل::29::::29::




شكرا سينشي كودو على المبادرة الجميله و الشاطر ممكن يكون مبرمج اول في المستقبل بس اهم شي مطلوب هو سرعه البديهيه و القدره على التعامل مع المسائل الرياضيه و ايجاد الحلول لها و اهم اهم اهم شيء الصبر و عدم اليأس

.
.
تحياتو

مذكرات حزينه
10-16-2008, 06:13 PM
اني شنو الي اموتني غير الرياضيات بس والله دائما الجأ الى الحلول الرياضيه بالبرمجه يعني اكو امل؟؟؟؟؟

يالله
اللهم اجعلني مبرمجه وفهمني اياها

Helix
10-16-2008, 06:30 PM
اني شنو الي اموتني غير الرياضيات بس والله دائما الجأ الى الحلول الرياضيه بالبرمجه يعني اكو امل؟؟؟؟؟

يالله
اللهم اجعلني مبرمجه وفهمني اياها



اكيد اكو امل منو كال لا
يعني قابل كل المبرمجين طاكين بالررياضيات
اكو كومة سوالف برمجه ما تحتاج رياضيات
بس اني جان قصدي من الرياضيات انو رح تسهل شغلات اكثر و اكثر
و الرياضيات مو شرط اساسي 100% و انما قصدي السهلوه للمبرمج اكثر

بس اذا جان قصدج ترسبين بالرياضيات رح تكون اكو صعوبات خاصتا اذا كان في مجال الألعب او برامج الرسوميات او برامج الحسابات المصرفيه مثلا

اني جانت درجاتي كله مثلا ستينات بس افتح الماده قبل الأمتحان بس و اهم شي انتبه على الأستاذ

بس الي علمني كنت ابرمج بعض المعادلات بالرياضيات و مرات من الفيزيه جنت ابرمج المعادله مال قذيفه بوكته جبت ملزمه مال صف خامس اعدادي
يعني هيج فيكاتن
المهم التمرين حتى اثناء العطله

و انشاء الله
الله يسر لكل مبرمج و اني بالخدمه لشرح الافكار و الكودات اي اكدر عليهن بدون تقصير
.
.
تحياتو

مذكرات حزينه
10-16-2008, 06:51 PM
شكراااااااااااااااااااااااااااا ان شاء الله متقصرون
افتهمت قصدك من الرياضيات ::50::
بس وين باقي المبرمجين ::32::::32::::32::::32::::32::::32::::32::

كتكوت ماوي
10-20-2008, 03:30 AM
هلو شباب صراحة اني اسمي المستعار اسد الكرامة بس هسة مبند هع
ودائما ادخل لهنا بس اتصفح ما اشارك بهذا المنتدى بس الفكرة مالت كاتب الموضوع كولش حلوة واتمنى نتشارك علمود نفيد ونستفاد


اولا اني خريج علوم حاسبات 2005
اللغات اللي مشتغل عليهة في بي سي سي بلس بلس اسيمبلي
ماجستير علوم تنكنلوجيا وعلوم المعلومات سردار باتيل الهند
اللغات المشتغل بيهة جافا اي اس بي اي اس بي نيت جافا سكربتنك .... كاشنك ... سي بلس بلس متقدم ... برمجة شبكات كابل ... سي هاش سي بلس بلس ..... في بي دوت نيت ....
اوبريشنال ترينر لشركة انفو سس ..... مدرب لشركة ساي بيس اوراكل و ماي اس كيو ال +بي اج بي
واخيرا او حالبا اني باحث وعلى طريق الدكتوراه ذكاء اصطناعي وطرق تركيبه علة انظمة ادارة المعلومية والحزمات
وعندي شهادة ام سي دي اي من مايكروسوفت ....

بعد هاي الهوسة كولهة ممكن تشركوني وياكم ولو بس بالافكار ... وخصوصا اذا جانت علة الويب تكنلوجي وقواعد البيانات

Helix
10-20-2008, 05:57 PM
هلو شباب صراحة اني اسمي المستعار اسد الكرامة بس هسة مبند هع
ودائما ادخل لهنا بس اتصفح ما اشارك بهذا المنتدى بس الفكرة مالت كاتب الموضوع كولش حلوة واتمنى نتشارك علمود نفيد ونستفاد


اولا اني خريج علوم حاسبات 2005
اللغات اللي مشتغل عليهة في بي سي سي بلس بلس اسيمبلي
ماجستير علوم تنكنلوجيا وعلوم المعلومات سردار باتيل الهند
اللغات المشتغل بيهة جافا اي اس بي اي اس بي نيت جافا سكربتنك .... كاشنك ... سي بلس بلس متقدم ... برمجة شبكات كابل ... سي هاش سي بلس بلس ..... في بي دوت نيت ....
اوبريشنال ترينر لشركة انفو سس ..... مدرب لشركة ساي بيس اوراكل و ماي اس كيو ال +بي اج بي
واخيرا او حالبا اني باحث وعلى طريق الدكتوراه ذكاء اصطناعي وطرق تركيبه علة انظمة ادارة المعلومية والحزمات
وعندي شهادة ام سي دي اي من مايكروسوفت ....

بعد هاي الهوسة كولهة ممكن تشركوني وياكم ولو بس بالافكار ... وخصوصا اذا جانت علة الويب تكنلوجي وقواعد البيانات


تسلم حبيبي الغالي على مشاركت ويانه و على سيرت البرمجيه الحلوه

و اني حاليا دا ادرس SQL و Wwb Engineerin و بنهاية هذا الفصل انشاء الله نخلصه ف اذا اكو شي نعرفة و نكدر نتعاون بي اني حاضر و حتى الكل يستفاد

.
.
تحياتو

كتكوت ماوي
10-21-2008, 05:14 AM
هلو حجي هليكس ... مس مع الاسف الباقين ووووووين ؟؟

Helix
10-21-2008, 06:27 PM
و الله حبي عدك البرمجه قسم يعتبروه علم يجب الأحتفاض به و محد يعرف عن نفسه و قسم ما عدهم وكت و يخاف من الأتزامات
.
---------
.
يمعودين شباب والله كومه اكو عقول عراقيه مبرمجه ليش هيج مو رح تفشلونه ::41::
يا مبرمجين حتى لو ماعدكم وكت
و لو كل سبوع تكعدون مره و تشاركونه هم تسون فضل

و للي يعتبروه علم يجب الاحتفاض به الله يهديكم بس ما رح تتطورون

.
.
تحياتو

اول السيطرة
10-27-2008, 04:27 PM
السلام عليكم
من صف سادس علمي بديت اشتغل VB6 و استمريت عليها الى ان تخرجت
اعرف ابرمج قواعد البيانات ويه فيجوال بيسك واصمم التقارير بال Crystal report 10
اشتغلت برامج احترافيه:
1- برنامج محاكي للمعالج 8085
2- مشروع تخزين بيانات الشاحنات الاهليه لشركة النقل البري -وزارة النقل
3-مشروع وصولات منفيست ادخال من سوريا ايضا لشركة النقل البري
4-مشروع تسجيل بيانات الطلاب ودرجاتهم للجنه الامتحانيه
5-مشروع تنسيق المشاركات بمنتدى المطورين العرب
6-مشروع تخزين بيانات خطوط المحمول و ادارة مكتب توزيع خطوط المحمول
7-مشرع البحث في القرأن الكريم
واي شي يتعلق في برمجة قواعد البيانات اني حاضر و شكرا

Helix
10-28-2008, 12:43 AM
تسلم حبي ابو قواعد البيانات على مشاركتك و تعاونك ويانه و انشاء الله نقوما بما بيه الخير و الفائده

اذا تحب عدي كتاب سي شارب تعليمي من الصفر و بي تعليم برمجه على قواعد البيانات

اذا تحب ارفعلكيا حتى طور نفسك و تترك بيئه الفجول بيسك السادس

و السي شارب كلش حلو يجمع بين سهوله الفجول بيسك و مهارات السي

الكتاب حجمه 22.3 ميكه اذا تحب ارفعلكيا

اني ما عدي مشكله اكو يمي انترنيت سريع

موفق انشاء الله


.
.
تحياتو

اول السيطرة
10-28-2008, 07:30 PM
اكون ممنون منك جدا اذا ترفعه و اني هم صراحه اشوف فيجوال السادس مو ذيج القوة بالبرمجه و بديت اقره فيجوال دوت نت بس توقفت فتره الامتحانات و ان شاء الله ارجعلها و شكرا

مذكرات حزينه
10-28-2008, 11:09 PM
ما شاء الله شنو هالتطور والله العراق بيه ناس تعبانه على نفسها
ربي يحفظكم ويزيدكم من علمه
ان شاء الله اكدر استفاد منكم وخاصة في مادة الذكاء الاصطناعي ولغة برولوج
نرجو دعمكم والتكرم على الاعضاء بشروحاتكم مثل مديسوي الاستاذ helix
تحياتي للكل::45::

Helix
10-28-2008, 11:28 PM
البرو لوك الفصل الجاي ادرسه انشاء الله

و انشاء الله ما ابخل على احد

و اذا اكو احد متمكن منه يا ريت نزلنه محاضرات عليه لو يدرسلنياها

.
.
تحياتو

DantiLeo
10-29-2008, 12:35 AM
السلام عليكم فرحت جدا واني اقراء امكانياتكم العاليه بالبرمجه والموضوع واقدم لكم نفسي واتمنى اكدر اساعدكم كوني عدت للدراسه من جديد الان
اشتغل بالبرمجه من عمري 11 سنه على حاسبات الوركاء 6001 وكنت مولع بالرسوميات ولسه اتذكر

اول برنامج عملته صاروخ فضائي من طار اشتعلت الصفكات والهلاهل بوقتها بالمعهد الي كنت ادرس به

بعدين صار عندي مدرس خاص وبديت ادرس الرياضيات على الكمبيوتر واطبق برامج حركه القذائف وحسابات الجيب والجيب تمام بالمرحله المتوسطه وكنت اعمل برامج الرسوم مال طلبه كليه الفنون الجميله المرحله الاولى ياخذون حاسبات وابيعها الهم الكود ويه المخطط

بالمرحله المتوسطه دخل الصخر الى حياتي لكن ضليت مقيد بالبيسك وماكان عاجبني الحال لكن وصلت بالبرمجه بوقتها الى كودات الـVpoke و الـvpeek الي كانت تتيخ لنا انشاء مثلا قفل للبرامج من اجل امكانيه توزيع البرامج على الاصدقاء دون ان يتمكن احدهم من تعديل الاسم او ماشاكل لنضمن بقاء حقوق الملكيه

شاركت بمسابقه خاصه بالبرامجيات نهايه المرحله الاعداديه وحصلت على المركز الاول وجهاز كوسموس 4000 الي هو عباره عن جهاز الكترونيك صالح لعمل 400 تجربه مثل الدوائر الالكترونيه وتصميم راديو ومتحسس مطر ومن هل الافكار

بالجامعه الي كان لازم تكون حاسبات انطلقت مداركي الحقيقه وكانت لحظه التعارف مابيني وبين الباسكال - الدلفي وكنت متفوق بحيث حصلت على منحه دراسيه للمرحله الثالثه والرابعه للدراسه مجانا على نفقه الجامعه وكانت المرحله الاولى والثانيه على نفقتي الخاصه

المرحله الثالث الجامعي انضميت الى فريق مبرمجين وساهمنا سويه بانجاز نظام التوفير في مصرف الرافدين على الفوكس برو 2.6
وكان مشروع التخرج من الجامعه للمرحله الرابعه هو نظام توزيع الطلبه على الاقسام حسب الرغبه والكفاءه العلميه وايضا نفذته بالفوكس برو

بنفس الوفت كنت انجز برامج لزملائي فانجزت نظام الفروض بالفوكس برو ونظام تصميم البطاقات الالكترونيه بالباسكال ولعبه جلكه بالبرولوك وموحود الكود ملتها بمشاركاتي ممكن تبحثون عن مواضيعي وتجدون الكود

مباشره بعد الجامعه الى الماستر وهناك كانت لحظه اللقاء مع الفيجول بيسك والتعمق به وخلال فتره الاطروحه الي كانت عباره عن منحه جامعيه ايضا كانت دراستي تتضمن انجاز برمجيات اختراق Firewall وبرمجيات ضغط ملفات وبرمجيات معالجه صوريه اميج بروسسنك

خلال فتره الدراسه بالماستر عملت نظام واحد هو نظام الحسابات والمبيعات لشركه سعوديه
وبديت العمل بشركه تختص بانظمه الشبكات بوقتها

طبيعي كوني الاطروحه قربتني من عالم الشبكات وكون شركتي اختصاصها شبكات فانزجيت بهل المجال بقوه وحصلت على شهادات MCSA,MCSE.MCTS.MCITP,CCNA ونتيجه الخبره الي تكونت قدمت معادله لشهاداتي وخبرتي لاستراليا وحصلت على لقب خبير امنيه شبكات مع اعتراف بخبره عمرها عشر سنوات

والان للتو حابدي مشوار الكورس الاول بالدكتوراه بتشجيع من زوجتي الي توفر لي كل الظروف المناسبه وراحه البال من اجل هل المشوار رغم انها هي نفسها طالبه

الان البرمجه عندي تشمل نوعين
الاول هو السكربت باستخدام لغات VB script و Shell بالتزامن مع WMIS,ADSI لانجاز برمجيات بسيطه تساعد مهندسي النظم على اداره الاكتف دايركتوري
والثاني هو الفيجول سي شارب 2008والفيجول بيسك 2008مع الاس كيو ال لانجاز تطبيقات مختلفه بالاستعانه بالـADO,ASP.NET

الخطوات القادمه الان انهاء دراستي الي بديت بها والاستمرار بعملي والحصول على شهادتي ccsp,cissp

وتسجيل براءه اختراع خلال الاسابيع القادمه وان شاء الله من تنتهي اطرح ملف الموضوع بالمنتدى

وهذا هو ملخص السي في الخاص بي
شكرا للوقت الي قضيتوه بالاطلاع على محتوياته

مذكرات حزينه
10-29-2008, 05:41 PM
اي والله تسوي فضل علينا اذا شرحت لغة برولوج بس شوكت تقصد على الفصل الجاي؟؟؟ ان شاء الله نستفاد من معلوماتكم
طبعا دا اشوف انه اذا اكدر اكول 97% من المبرمجين هم ولد
يعني جددددددددددددددددددددددددا قليل تلكى بنات مبرمجات محترفات
وهذا الي ديخلي الاساتذه يركزون بتدريسهم على الولد ويهملون الانتباه لاسئله البنات وخاصة بالمحاضرة
ولو مو عند كل الاساتذة هالاسلوب
اممممممممم هسه اني لو اضبط لغة وحده بس ::29::::29::::29::مو لازم مثلكم ما شاء الله ممخلين لغة تعتب عليكم
الله يوفق الجميع::45::::45::::45::

مذكرات حزينه
10-29-2008, 05:47 PM
بس سوووووووووووووووووري سؤال
انت كتبت ادرسها
لغة برولوج انت الي راح تدرسها الفصل الجاي لو انت الي راح تقوم بعمليه الشرح ؟؟

Helix
10-29-2008, 05:55 PM
رح اسجه
رح اقراها
رح أدرسلكمياها و ره الفصل الي رح ادرس بي
يعني وره العطله الصيفيه و ره ما اضبطه زين و اخلصلكم السي شارب
و يجوز اخليكم تبرمجوه بالسي شارب بعون الله

يعني اذا يجي واحد هسه يسوي فضل
.
.
تحياتو

Helix
10-29-2008, 06:08 PM
عاشت ايدك دكتور دانتي مقدما و انشاء الله تحصل على الدكتورا بجداره

و ألف رحمة الوالديك على مشاركت ويانه و انشاء الله التوفيق و الذرية الصالحه

و اني دا احول اشمر روحي على الشبكات بس ما دتسمح الضروف و لازم اخلص دراستي

و دا اريد ادرس ال ccna و ccnp و mcse
بعون الله
و اذا اكو شي تكدر تنصحني بي بموضوع الشبكات يا ريت

و شلون ابدي بيه

و ولو اني تقريبا اتجاهي بالبرمجه رسوميات و من ذني الفيكات

بس مدا ادري شنو اقوه شي بعالم الحاسبات و البرامجيات

و بشنو لازم اضل مجلب


.
.
تحياتو

DantiLeo
10-29-2008, 06:50 PM
اخي العزيز
اول امر انصحك به هو اللغه الانكليزيه لانها الاداه الي بدونها ماممكن تعمل شي حقيقي بحياتك
الامر الثاني
لا تدرس المصادر العربيه لانها بالغالب غير مفيده

بالنسبه للشبكات انت عليك ان تختار مابين المايكروسوفت والسيسكو لان ماممكن ان تجمع بين الاثنين وحاول تلفي نظره على لينكس واليونكس

حتى تبداء تحتاج ان تدرس منهج السيرفر والانفرا ستركجر والاكتف دايركتري والاكسجينج سيرقر والايزا سيرفر والاس كيو ال سيرفر وصولا ان تصل لحد الاحتراف فيما يخص المايروسوفت
وتدرس السوج والراوتر كاساس فيما يخص السيسكو
المناهج كثيره والامر محتاج كثير شرح انا انصجك ان تزور الموقع الاتي
http://www.cisco.com/web/learning/le3/learning_career_certifications_and_learning_paths_home.html
به كل انواع الامتحانات والشهادات الخاصه بالسيسكو
وهذا الرابط
http://www.microsoft.com/learning/mcp/certifications.mspx
فيما يخص مايكروسوفت
واي سؤال اهلا وسهلا وبه
شاكر لك دعواتك وامنياتك وبالموفقيه ان شاء الله

Helix
10-29-2008, 07:19 PM
اخي العزيز

اول امر انصحك به هو اللغه الانكليزيه لانها الاداه الي بدونها ماممكن تعمل شي حقيقي بحياتك
الامر الثاني
لا تدرس المصادر العربيه لانها بالغالب غير مفيده

مدشوف شويه براسي خير

بالنسبه للشبكات انت عليك ان تختار مابين المايكروسوفت والسيسكو لان ماممكن ان تجمع بين الاثنين وحاول تلفي نظره على لينكس واليونكس

انشاء الله بس وره ما انصبه القي نضره وين وين لازم اكعد ادعفس بيهن

حتى تبداء تحتاج ان تدرس منهج السيرفر و الانفرا ستركجر و الاكتف دايركتري و الاكسجينج سيرقر و الايزا سيرفر و الاس كيو ال سيرفر وصولا ان تصل لحد الاحتراف فيما يخص المايروسوفت

و لو رح اتعبك ويايه ميخالف تكلي كل وحده شنو
ياهو الي برمجه و ياهو الهاردوير و شلون احصل كل وحده منهن
و ال SQL دا ادرسه بس مو السيرفر
و رح يدرسونه الأوراكل على فصلين يمكن وياها سالفه اوراكل سيرفر

وتدرس السوج والراوتر كاساس فيما يخص السيسكو

انشاء الله دي درسونياها

المناهج كثيره والامر محتاج كثير شرح انا انصجك ان تزور الموقع الاتي
http://www.cisco.com/web/learning/le3/learning_career_certifications_and_learning_paths_home.html (http://www.cisco.com/web/learning/le3/learning_career_certifications_and_learning_paths_home.html)
به كل انواع الامتحانات والشهادات الخاصه بالسيسكو
وهذا الرابط
http://www.microsoft.com/learning/mcp/certifications.mspx (http://www.microsoft.com/learning/mcp/certifications.mspx)
فيما يخص مايكروسوفت

انشاء الله اشوفهن بعطله الاسبوع

واي سؤال اهلا وسهلا وبه
شاكر لك دعواتك وامنياتك وبالموفقيه ان شاء الله


تحياتي الك ورده و انشاء الله محد يقصر ويا الاخ و الكل اخوة


.
.
تحياتو

حسن ماستر
10-31-2008, 11:11 PM
شكرا Helix_Abdu على هذه المبادرة الحلوة وانشاء الله تعود الفائدة على الجميع

شلونكم اخوتي الاعزاء ....
رح اقدملكم سيرتي البرمجية (خاصة) وغير البرمجية (عامة)

في اطار البرمجة :
اني بديت ابرمج من كنت بالاعدادية يعني بالضبط بالخامس العلمي , وكانت بداياتي مع باسكال (كلكم تعرفوه) وسويت بيه برامج حلوة (مبتدئة) الى ان بعدين سويت رسوم بيه مثلا شجرة وارض وماء (فد شي كلش طاك) , وبعدين طبعا بالسادس غادرت فد شي اسمه برمجة والتهيت بالقراية والحمد لله معدلي 92 يعني شي زين مو ؟؟ , دخلت كلية هندسة حاسبات ودرسنه الباسكال (طبعا اني عندي زلاطة) وعملنا على لغة ++C (طبعا كلش ماحبيتها) لأن اللي يحب باسكال ما يحب ++C وبعدها بدينا ندرس الفجوال بيسك بالكلية بس طبعا الكل يعرف دراسة الكلية مو تمام فاتجهت الى تعلم كافة دعافيس الفجوال بيسك بنفسي وفعلا صممت برنامج كلش حلو ورح ارسله انشاء الله واشرحلكم عليه لاحقا .
وبعدين طورت نفسي بقوة بالفجوال بيسك السادس وعملت برامج كلش هواية بيه مثلا برامج مشاريع التخرج الخاصة بالرابع في الكلية مع داتا بيس , وبعدين تخرجت من الكلية , وانا اعمل حاليا في احدى الشركات التابعة لوزارة الصناعة والمعادن العراقية في مجال البرمجة في تصميم انظمة الادخال والاخراج على الفجوال بيسك السادس , اضافة الى كوني خبير في البرمجة في Access وتصميم انظمة متفاعلة بيه , وكيفية ربط عمل الفجوال بيسك مع ال Access وال Word وال Excel وجعلهم نظاما تنصيبيا واحدا , اضافة الى طباعة التقارير باستخدام Printer Object .
وسويت بالفجوال بيسك برنامج شبيه بال Windows Media Player اي اشغل اغاني صوت وصورة , وبرنامج اخرمتصفح صور , وبرنامج خاص لعملية البحث مثل ما موجود بالوندوز .
اضافة الى ذلك درست ال SQL وكل الفيكات الخاصة بيهه (فد شي طاك) , ودرست ماتلاب (بس مو طاك).




اعشقُ الفجوال واعشقُ من يعشقه .......... فبكَ الحبُ وبانفاسكَ العمر



جاءت جمـــوع الخـلق تحيا بحبك .......... يا عبيــرا من عبيـر العنبـر

طبعا لا تتفاجئون اني شاعر


في الاطار العام :
عملت تصاميم في الكوريل درو العاشر (تصاميم طاكة) وتصميم شعارات الشركات اضافة الى عمل تصاميم دليل الشركات .
اضافة الى ذلك عملت صفحات ويب (HTML) متفاعلة بالكوريل درو وصفحات (PDF) , واكتسبت خبرة في هذا المجال (كلش هواية) .
عملت فترة ك مصور في ستوديو تصوير وعملت كل البلاوي في ال PhotoShop (يعني خبير بالفوتوشوب) يعني اذا تجيني وحدة تشبه المغنية (وعد) اطلعها (نانسي عجرم) .
عملت في برامج المونتاج الكثيرة فمثلا خبير في برنامج ال Ulead Media Studio Pro 8.0 وخبير في برنامج Adobe Priemere Pro2 و Adobe After Effect2 وعمل كل الفيكات التلفزيونية المختلفة مثلا فيكة قناة الجزيرة (تصميم مشترك Corel Draw 10 مع Adobe After Effect2) .
كذلك خبير في برنامج المونتاج الشهير Video Studio (بس انصح ان ماتشتغلون عليه وتعوضون عنه ب Ulead Media Studio Pro 8.0 )

اضافة لكوني خبير في معاجلة الفايروسات ببرامجي المختلفة (وجود او عدم وجود نت اون لاين) ومستعد ان ارسل اي برنامج معالج فايروسات حسب نوع الفاروس للي يحتاج وكذلك طريقة عمله .

اضافة الى خبرة متقدمة في صيانة الحاسوب (طبعا غير اني مهندس !!!).
اضافة الى تجهيز الحاسبات (ماخذ شارع الصناعة فلاحة ملاجة) .



اتمنى ان ما اكون طولت عليكم بس هايه هي سيرتي البرمجية وغير البرمجية , ولأي معلومات يمكنكم مراسلتي على البريد الالكتروني


H_Mas85@yahoo.com (H_Mas85@yahoo.com)





مع تمنياتي للجميع بالتوفيق انشاء الله .........

DantiLeo
11-01-2008, 10:11 PM
حتى تبداء تحتاج ان تدرس منهج السيرفر و الانفرا ستركجر و الاكتف دايركتري و الاكسجينج سيرقر و الايزا سيرفر و الاس كيو ال سيرفر وصولا ان تصل لحد الاحتراف فيما يخص المايروسوفت


و لو رح اتعبك ويايه ميخالف تكلي كل وحده شنو
ياهو الي برمجه و ياهو الهاردوير و شلون احصل كل وحده منهن
و ال sql دا ادرسه بس مو السيرفر
و رح يدرسونه الأوراكل على فصلين يمكن وياها سالفه اوراكل سيرفر

كل المناهج التاليه هي سوفت وير مو هارد وير والمايكرسوفت ماعدها مناهج هارد وير والمناهج هنا هي ليست برمجه بل هي الانظمه التي من خلالها تعمل الشبكه ماعدا طبعا الاس كيو ال
السيرفر هو الوندوز سيرفر 2003 او 2008 مثلا مثلا وهو نظام التشغيل الذي تعتمد لانشاء شبكه

و الانفرا ستركجر هو معماريه تطبيق ربط عده سيرفرات لتكوين شبكه مع تصميم الخدمات المقدمه من هذه الشبكه

و الاكتف دايركتري هو تطبيق بداخل السيرفر يسمح بانشاء
حسابات مستخدمين للسيطره على الشبكه من خلال منح تراخيص الدخول من قبل ادراه الشبكه

و الاكسجينج سيرفر هو تطبيق خاص يتم تنصيبه بعد تنصيب السيرفر خاص بعمليه توفير خدمه البريد الالكتروني

و الايزا سيرفر خاص بتحديد السياسات الخاصه بالدخول الى الانترنت مثلا منع مواقع معينه الخ

و الاس كيو ال سيرفر السبرفر الخاص باستضافه قواعد البيانات

Helix
11-02-2008, 01:15 AM
تسلم اخويه حسن على سيرتك البرمجيه و انشاء الله ما تقصر ويانه و الكل يستفاد و الله يحقق امانيك و يكتبلك كل الخير

تحياتي الك اخوك دائما و ابدا

و اذا يصحلك و عدك محاضرات مال html دزلياهن لأن الدكتور الي دي درسنه مخرف شويه

.
.
تحياتو

Helix
11-02-2008, 01:22 AM
حبيبي الغالي اخويه دانتي تعبتك ويايه و اشكرك على الشرح السهل الحلو و انشاء الله الموفقيه و الدكتورا بأمتياز

و اذا انته عدك استفسار على اي شي اكدرله اني حاضر

.
.
تحياتو

المهندسة لارا
12-01-2008, 08:43 AM
السلام عليكم
اني لارا
اعرف سي و سي بلس بلس
و شوية بيسك وشويه برولوك
و كنت اتمنى اتعلم وياكم سي شارب

محمد محسن الحسني
12-02-2008, 11:00 PM
مرحبا ! السلام عليكم ؟
طبعا ماكو شيء ممكن ان اقوله عن نفسي ؟؟؟؟؟؟؟؟؟؟
بس حبيت اقول شيء و اشياء كثيرة ...

ان بصراحة لا اعرف بتحديد منذا متى ان ابرمج ( يمكن في بطن امي ابرمج يمكن ) بس كل لي اعرف اني سأستمر على البرمجة و اتعلم الكثير الكثير .....
حاليا عندي بحث شخصي على سي بلص بلص و اعلم انه سيكلفني سنوات بس بدأته و يجب ان انتهي منه .
الفكرة جميله جدا هنا ......

يجب علينا ان نكون مجموعة من المبرمجين و نطلق الكثير من البرمجة في خدمة كل شخص عربي ( ليش ) حاول ان تكتشف ليش لحد الان دعم اللغة العربية قليل ..........

اعتذر بس بعد عدة ايام احاول ان انشر دروس متخصصة في البرمجة ............ ( بلغة العربية طبعا )

Helix
12-03-2008, 12:56 AM
تسلم مين مهندسه لارا على المشاركه ويانه و دروس السي شارب مفتوحه للكل باي وكت و اي سؤال حتى لو قديم

و اشكر اخي محمد على مبادرتك الطيبه ويانه و انشاء الله تفيدنه و تفيد الكل و اكيد الدروس بالعربي و حتى لو انكليزي و توضيح بسيط بالعربي

و اذا تحاتج معاونه انشاء الله اني محد يقصر وياك


..
.
تحياتو

Ḿǿη$ţẺŗ☆Ţ.!.Ҝ.Ŗ.Ể.Ţ
01-01-2009, 02:58 PM
http://www.atyab.com/uploadscenter/uploads/b2979a051d.gif




http://www.althkra.net/pic/ep/a5.gif

Snake The Programmer
05-04-2009, 09:22 PM
مساء الخير, موضوع رائع بشكل عاشت ايدك عليه يا صديقي Helix



اني سيرتي البرمجية بسيطة و بعدها قيد التطوير



بديت اول حذافير برمجتي من كنت بالثالث او الرابع ابتدائي, كان عندي جهاز قديم جدا حتى مستحيل نحسبه على الكومبيوترات, كان اسمه الاكواريوس, ابن خالي كان عنده الصخر و كنت اشوفه شي كلش طاك بالنسبة لجهازي الفاشل مرات اتسلل لبيتهم و اكابل الجهاز من اول ما اجي الى وقت طلعتي او بالاحرى "طردتي" ههه



طبعا جهاز الاكواريوس كان كلش قديم بحيث تصور حتى مكان بي مفاتيح الFunctions (F1-F10)i بس كان بي نظام برمجة داخلي يمشي على الSimple Basic و نطوني وياه كتاب بي الTutorials مال هذي اللغة من الصفر, طبعا بذاك الوقت اني كنت كلشي ماكو بالانكليزي فكنت اكعد ساعات اشوف البرنامج الموجود على الصفحة بالكتاب و انقله نفسه حرف بحرف بلا حتى ما افتهم شنو المكتوب بس المهم معتبر نفسي داكتب برنامج, حتى مرات كنت اطول ايام بالبرنامج كل يوم احزنه على كاسيت و الخ, لان كان حلمي من الطفولة ان اكون "عالم حاسبات" هههه شكد حلو عود مو مهندس ولا مبرمج, "عالم" !!



المهم دخلت للثانوية و كانت شوية براسها خير بحيث درسونا الحاسوب من الاول, اول شي درسنا نظام الDos و كنت اكرهه بشكل لان كنت اريد البيسك على اساس كان احدث نظام برمجة "على الاقل هيجي اعتقدت", بالمراحل الوراها اخذنا اللغات Simple Basic و Pascal الي هسة طورتها شركة Borland الى الDelphi و طبعا هنا بديت ابدع لان كان عندي واهس كلش كبير بيها ورجعت على الكواريوس القديم مالتي و بديت اكتب البرامج وحدي بلا الكتاب المساعد او دفتر المدرس يعني بين قوسين طكيت بالBasic, اخر شي سويت من عندي برنامج يسوي ساعة بس شنو تخرب ضحك, يلا المهم صحيحه بس كان الكود مالته تقريبا 500 سطر و مشكلته انه يرجع للصفر بكل مرة انفذ البرنامج, يعني ميعتمد على وقت الكومبيوتر, اما بالPascal فكانت عندي معلومات كافية عنها بحيث اكدر اكتب البرامج المختلفة بيها, ولو تعلمتها بلا فائدة
وراها طبيت للسادس و حالي حال شكو طالب نسيت شكو بالدنيا لا برمجة ولا اي شي بس مقابل كتبي و كاعد, و الحمد لله جبت معدل زين دخلني كلية هندسة البرامجيات بالتكنو
هناك اخذنا بالمرحلة الاولى برمجة نظام الDos بأستحدام الC++i و طبعا رجعلي واهسي بالبرمجة و قضيت السنة كلها بمختبر البرمجة اسأل و اطلب امثله و برامج بحيث الاساتذة بالبداية كان عدهم واهس وياية بس اخر شي طكت روحهم مني , وبديت ادخل على النت و اشوف الامثلة و انواع الFunctions الموجودة بكل Library و البرامج و حلولها...الخ , المهم بنهاية السنة صارت عندي خبرة كبيرة جدا بالبرمجة بهذي اللغة بحيث اكدر اسوي اي برنامج يخطر ببالي
بدت العطلة الصيفية و صارلي واهس بشغلتين البرمجة بالVisual Basic, و برمجة المواقع بس طبعا احتجايت شي بدائي فبديت بالHTMLطبعا مصدكت العطلة بدت ركض دورت بالنت على كتب الكترونية و شروحات مفصلة للVisual Basic و بديت اتعلم, طبعا ما اكلكم صرت خبرة, بس صارت عندي معلومات كافية عن البرمجة بهذي اللغة بس ما كان عندي واهس بيها لان كنت اول شي اسمع و هسة شفت انها لغة كلش مبسطة والبرامج الي بيها يعني خلي انكول, اي واحد يكدر يتعلمها يعني مو مال واحد يريد يصير مطور برامج
طبعا همين تعلمت البرمجة بالHTML, اشتريت كتاب من يم الجامعة بأسم "HTML For Dummie" هههه من اسمه يعني من الصفر اللغة كانت كلش سهلة يعني تصوروا تعلمتها كلها بفترة اسبوعين الى ثلاثة و سويت موقعي الخاص بيها
و هسة اني حاليا بالمرحلة الثانية و تعلمنا بيها لغة جديدة او بالاحرى قديمة الAssembly الي هي كلش قديمة و بدائية يعني حتى اقدم من الDos بس شنو كلش مهمة لاي شخص يريد يحترف تطوير البرمجيات لانها متعلقة بشغل الProcessor
و اخذنا دروس متقدمة عن برمجة الC++i المتعلقة بهياكل البيانات, طبعا فقدت واهسي ببرمجة الDos و بنفس الوقت صارت البرامج معقدة بشكل بحيث شكو واحد بقسمي صار يحفظ البرنامج و يروح يمتحن بس زين كدرت اواكب وياه الدكتور
بالعطلة الربيعية الفاتت قضيتها اطور نفسي ببرمجة المواقع فرحت على الPHP و الXML و صرت خلي نكول زين بيها لان اكدر اطور مواقعي او حتى اعيد بنائها بهذي اللغتين
حاليا عندي توجه جديد هو برمجة ال Windows API Programming بلغة الC++i باستخدام ال Visual C++i لان بصراحة مليت من برمجة الDos الي ما بيها فائدة لان البرامج الي بيها كلها بدائية حتى لو كانت متقدمة برمجيا تظل بدائيا مقارنة بالWindow, طبعا هذي اللغة مكافئة للغة الVisual Basic بس يعني صدك مال مبرمجين لان ما بيها اي برامج جاهزة نكدر نستعملها ببناء البرنامج , اما ببرمجة المواقع صار عندي توجه جديد بلغة الJava Script و الCSS, ان شاء الله ابدا بيها بالعطلة القادمة و انطيكم التطورات بيها
بالمناسبة صادفت بعض الصعوبات بالعمل على الWINDOWS API فأذا اي عضو عنده خبرة بهذا النوع من البرمجة اذا ممكن يراسلني لان احتاج اي مساعدة بتعلم بدائيات هذي البرمجة
تحياتي

حسن ai
07-05-2009, 02:51 AM
اسمي حسن
حبيت البرمجة من جنت صغير بس الاوضاع جانت متسمح حتي اقتني حاسبة
خريج الجامعة التكنولوجية قسم علوم الحاسبات و نظم المعلومات
اللغات الي اعرفهة هي
فجول بيسك
اوراكل
بيسك
فجول فوكس برو
برولوك لان اني اختصاص
اسيمبلي
c++

ترجمان
10-17-2009, 06:48 PM
السلام عليكم اني وبكل تواضع مبرمجة صغيرة جدا قياسا بغيري وقياسا بحضرتكم يعني برموجة لحد الان اني طالبة وادرس البرمجة وبدأ مشواري من المرحلة الاولى من الجامعة لانه (مجنت احب الحاسبة )
شاركت بمسابقة برمجية في الجامعة اسمها ictc بالمرحلة الثانية , درست لغة ال c++ ,visual fox pro , assambly ,html, visual basic هذه اللغات درستها بالجامعة بس اكيد مثل متعرفون مو بتوسع وشمولية بس انا حاليا احاول اطور نفسي بلغة الفجوال بيسك , لدي حاليا برنامج من برمجتي مفيد جدا اريد الاستفادة منه ماديا يفيد اصحاب المحلات بكل انواعها , وان شاء الله افكر اشارك بمسابقة ictc من جديد بمشروع اخر قيد البرمجة , اتمنى ان لا اكون قد اثقلت عليكم والسلام

Free Mind
02-03-2010, 06:37 PM
مساء الورد

طبعا استحيت من شفت ها القصص مالتكم ، بالنسبة الي احب لغات البرمجة و بديت بالدوز طبعا وبعدين خلال اربع سنين بديت اقرة هواية لغات من ضمنها c , c++ , vb 6 , vb.net وقسم من لغات و سيكربتات تطوير المواقع مثلا الجافا سيكربت و الphp شوية و asp.net اخر شي ، بس اكثر شي احبة هو الشبكات اموووت عليها هع

فقريت عليها كلش كلش هواية كتب انكليزي و عربي ، و اريد ادخل مجال برمجة الشبكات لأن شغلة حلوة

بالنسبة لقواعد البيانات فطبعا بديت بألأكسيس و طورت نفسي بيها و سويت برنامج على الفيجوال بيسك 6 يرتبط بيها البرنامج كان لدكتور بجامعة معنية راد يسوي قاعدة بيانات لكل الموضفين بس مع الأسف و ره مخلصته انمسح الهارد كله مالتي و كل الكتب و البرامج و من ضمنها هاذا البرنامج انمسحت ، حاولت ارجهن بس هواية راحت حرامات ، طبعا الكتب جمعتهن من الأنترنيت لمدة اربع سنين و راح كل التعب ، بس همزين قاريهن كلهن

المهم ، اشتغلت بالفوتوشوب فترة مو قصيرة و قريت كل help الخاص بيه بالأنجليزي طبعا و كمت اعرف شلو يشتغل بالضبط مو بس استعمال الأداة و حاليا متمكن جدا منه الحمد الله ، و متمكن من الأساسيات اللي تأهلك تشتغل على اي برنامج رسم مو بس الفوتوشوب ، اشتغلت 3d فترة و عرفت هواية من المبادئ الأساسية اللي يعتمدها وو صلت مرحلة متوسطة بيه و وكفت

واهسي بالهاردوير هم ، فقريت عليه هواية و تعلمت الهيكلية مالت كل جهاز و شلون يشتغل و شنو اكثر اعطاله و صيانتها

بس اكثر شي احبة هو الشبكات و كل ما يتعلق بيها ، من برمجة و ربط و صيانه و بروتوكولات و سيكيورتي و هاكر اخلاقي و هارد وير و كلشي ، حايا ادرس دوائر منطقية و الكترونيات و كهرباء بالكلية و اللي طبعا راح تفيدني كلش بالمستقبل ويه الهاردوير

طورت لغتي الأنكليزية اللي احبها من البداية (يعني من الرابع اعدادي بديت) و اللي فادتني كلش كلش


::57::سيرة متواضعة بالنسبة للباقين ... دمتم بالف خير ::57::

Helix
02-04-2010, 10:40 PM
حياك الله ميمو سيره حلوه و قهرتني على الكتب الي راحت و ان شاء الله ما يضيعلك تعب بعد

هاك هذا اميلي نسولف بي خلي نطور روحنه

helix_abdu@yahoo.com

Free Mind
02-09-2010, 01:06 PM
تسلم وردة ، و اسف على التاخير بالرد ، عندي امتحانات هذه الأسبوع الجاي كله راح يخبلونه ذولة ههههههه

و ان شاء الله بس اخلص و يصير خير ، ودي و تقديري ::57::

Rasoo123l
02-09-2010, 04:35 PM
اني عضو جديد بالمنتدى واليوم صفحت بيه وعجبني بصراحة

وهاي سيرتي باختصار

اني طالب وانص مبرمج فاني احتاج بعض المساعدات منكم
اعرف لغة الباسكال و السي بلس بلس والفيجوال سي بلس بلس وبعض من ال emu8086

لهذا اتمنى ان تفيدوني
وشكراً........ ::55::
وان شاء الله ايضاً افيدكم

new moon
03-20-2010, 02:14 AM
السلام عليكم اني طالب مرحله رابعه بجامعه بغداد قسم حاسبات
اني ابرمج بلغه باسكال واعرف لغه باسكال من المتوسطه وامبرج ايضا بلغه vb6 وايضا vb.net بس اني مو كلش قوي بلغه فشول بيسك وهسه اني كاعد اتعلم لغه java
اتمنه استفاد من خبراتكم اني عندي واهس قوي بالبرمجه بحيث برامج الجامعه اني ابرمجها واطيها للاصدقاء الويايه بالجامعه وهذا دليل على حبي بالبرمجه
اتمنه استفاد منكم
شكرا على هذا الموضوع الفوق الرائع
::2::