اصفن واحاجي الروح وين احنة جنة هم ترد الايام ويلتم شملنة

[لميس المنصور]

شونكم حبايب الموضوع اليوم مهم وهو اكيد كلنة مرينة بيها اخوان كل واح فارق ناس هواية عزيزين عليه قسم سافرو وقسم الى رحمة الله احنة نضحك يويمية بالمنتدى ونسولف بس لازم نذكر الحزن شوية لان هو اللي ينطينة القوة اني احجيلكم عن نفسي اني من صار السقوط ثاني يوم خسرت والدي كتلو الامريكان وهذا جان اصعب يوم بحياتي لان جنت صغيرة وعبالي الاب ميموت هسة الا يكبر ويصير جدووو بس مرت الايام وتعودت وكمت يومية اشوف الموت بعيني خاصة الفترة اللي مرت الناس اللي اكنتلو وراها بالمدرسة اني جنت بثانوية العقيدة وجنة كل يومية نودع صديقة عزيزة علينة لو تسافر لو يهددوهم وتعوفنة بس ضلينة اصدقاء وليهسة ننتظر اليوم اللي نرجع نلتم بيه اني كل سنة اذكر ابوية ع الفطور من جان يكعد ع الميز واذكرة بالعيد من الصبح يروح يصلي ويجيب الكاهي ويطلعنة مرت الايام واني هسة رح اروح للكلية بس ولا فد يوم حسيت ابوية ماكو هوة وياية بكل نفس وانتو همين يا ريت تذكرون شخص غالي وتحجونة شوية عليه وحتى اللي عندة احد مسافر يحجيلنة عليه وان شاء الله يشوفة باسرع وقت اختكم الصغيرة لميسسسس

[الكيميائيه الصغيره]

موضوع حلو لموسه اني صديقتي واختي اضطرت تسافر بسبب الاوضاع ومن سافرت لليوم مدا الگه صديقه تعوضني عنه ويارب ترجع فد يوم واشوفه ::57::

[لسعة شقاوة]

شكرا حبيبي لموسة بالبداية احب اكلج البقاء في حياتج وانشاء الله خاتمة الاحزان والله ليشوف لاحد فقدان العزيز لان اصعب شي بالدنيا الفراق >> اني فقدت قبل سنة تقريبا اعز صديقة الي واقربهم يعني علاقتي كلش قوية بيها وباهلها راحت بألانفجار مال مرطبات حسان الي بالجادرية وشلون موقف جان رهيب اهلها مسافرين وهي بيت جدها وراحو يم حسان لان دتنتظر ابوها يجي من السفر يشوفها هناك لان منطقتهم جانت ساخنة وصار الانفجار وابوها بأيدة وداها للثلاجة مال موتى ألى رحمة الله الله يرحمها ويرحم موتانا جميعا امين ربي

واسفة على الاطالة

[golden_hawk]

شكرا لموسه على الموضوع الجميل والحزين بنفس الوقت واحب اكلج البقاء لله وخاتمة الاحزان ان شاء الله واني وكل الاعضاء مقدرين الحاله اللي انتي دتمرين بيهه وهيه اصعب حاله لان فقدان الاب اصعب شي بالحياة بس احب اكلج ان شاء الله احنه كلنه اخوتج وكلنه عون الج اي شي تحتاجين والله محد راح يقصر سواء بالكليه او بالمنتدى من الشباب والبنات وان شاء الله تنسون ايام الحزن وترجعلكم الابتسامه.
اخوجgolden_hawk.

[سناريا]

::29::::29::::29::::29::

البقية بحياتج حبيبتي والله يساعدج ويصبرج يارب
والله حبيبتي اني فاركت كل الناس الاحبهم وكلمن صار بدولة
الي عفتهم بالعراق والي عفتهم بعمان والي عفتهم بكندا
بس ان شاء الله يرجع العراق ويرجع يلتم شملنا
مشكورة حبيبتي على الموضوع القيم الي من خلاله
راح نتشارك احزانا

::51::::51::::51::::51::

[حسن23]

عيوني لموسة الوردة البقية بحياتج وياربي خاتمة الاحزان وان شاء الله بيكم البركة واني احيج على صبرك وقوتك وياربي تتفوقين بحياتك وياربي يعوضج خير عن صبرك ومعاناتك
عاشت ايدج الموضوع اكثر من رائع وكلش حلو وفد شي جديد ... بالنسبة للاحباب الي فقدناهم هم هواي ما احب اذكر احد حتى لا اظلم غيرة بس راح اذكر كم واحد عزيزين علي اصدقاء هاي غير الاقارب

انصدمت بوفاة انسانة عزيزة علية وبعدين سافرو اصدقائي الي كنت اعتبرهم صدك اصدقاء حقيقين واكثر من اخوة وهسة هم بلبنان بعدهم ما حسيت بالصديق الحقيقي لحد الان
اووووووه طولت عليكم بس الموضوع شدني واتذكرت هواي شغلات اسف على الاطالة

[لميس المنصور]

تسلمون حبايب ع الردود الحلوة والله يساعدنة يا رب احنة العراقيين هواية مرت علينة احزان بس لازم متاثر علينة

[جوري_88]

البقية بحياتج و ان شاءالله ما تشوفين مثل ذاك اليوم ابد و ماتشوفين الا الخير و السعادة يا رب حيل اتاثرت بقصتج الله يصبرج و يوفقج ان شاءالله ..........

بالنسبة الي.. صف اول كلية جانت احلللللللى سنة بحياتي كلها لان جانت عندي صديقة من احجي وياها عبالك دا احجي وية روحي وحيييييل وفية و كلششش جنت احبها و هي اتحبني ...بس هاجروا هي و اهلها لعمان ببداية صف ثاني و بقيت وحدي و بالكوة لكيتلي صديقات يعني حيل اتاذيت بروحتها ... و بقيت صف ثاني كله و بداية صف ثالث يعني تقريبا سنة و كم شهر اني ابجي على فراكها و على الاذية اللي شفتها بلياها .....

طبعا اهم شي انكول الحمدلله و الشكر على كل شي و ان شاءالله الله يصبر الجميع و يعوضنا على كلما مرينه بيه ... وشكرا

[لميس المنصور]

تسلمين حبي جوري ان شاء الله ترجعون تتشاوفون مرة ثانية واحنة كلنة اصداقئج ولا تتاثرين حبي هاي كل واحد وشكاتبلة رب العالمين

[مهند مال فرعنا]

اللهم ارحم كل اموات المسلمين واسكنهم فسيح جناتك آمين يالله
صراحة اني فقدت اخ وما اكول صديق لأن ما اكدر اوصف أحساسنا أتجاه الأخر
قبل أستشهاده بيوم كعد يمي وظهرية اذكر وبقينا للعصر نسولف ونضحك عادي وبوقتها طلب من وصلة (كفية) كنت البسها بأيدي وكال أريد أبقيها يمي لأن انت راح تروح باجر .. أني بوقتها علساس ثاني يوم اروح سفرة للمصايف .. وفعلا رحت وبقيت اسبوع وتونست كلش كلش وبطريق الرجعة خابرني صديقي الثاني وكالي انو فلان استشهد هيجي وهيجي
اني مصدكت بالاول وبقيت ساكت فأخذوا التلفون مني وبعد دقايق يلا استوعبت الواقع و اكثر شي قهرني انو اني ما موجود بالفاتحة مالته
فرجعت ورحت للفاتحة وبقيت يم اهله وتصورا اهله مخلوني اروح وبقيت يمهم .... يعني اصعب موقف من دخلت لبيتهم وخصوصا هو المرحوم كان يحبني اكثر واحد وتصورا مخلي صوري واجهات بالموبايل وبالحاسبة واهله يعرفون بمحبته الي ويعزوني كلش
يعني من يشوفوني عبالك يشوفون المرحوم
يعني اني مواقفه وياية لحد الان ما ناسيها واذكرها لحظة بلحظة
واني ندمت على شي بحياتي ومكررته مرة ثانية
لأن كنت بطبعي ما احب أصارح واحد بحبي اله أو اهتم بيه حتى لو كنت احبه
فمعاملته الي كانت كلش خاصة واني ما كنت ابادله بنفس الاسلوب الصراحة فندمت على هذا الشي ومكررته
بحياتي مرة ثانية

نصيحة لكل واحد : اذا كنت تحب واحد وهوا مهتم بيك فبادله بالتعامل بنفس الأسلوب حتى لا تندم بحياتك


وشكرا لصاحبة الفكرة لميس المنصور
صراحة فكرة روعه كلش