قصيدة وجدانية بعنوان (صرخة سجن)

[احمد الحسيني]

السلام عليك

(قصيدة كل كلمة فيها هي صورة ملموسة في وقعنا الخارجي)

بألوان صعبة ارسمت دگات نبض الصرخ
من يمشي فوگ الجمر
ماچنة أبد محترگ
صرخاتة تطلع طفو بركان من الطفو
ويسدة باب الحلگ
عالفگر نام الفگر وتوسد علة الحزن
شجرة ضحكتة صفت
مبتورة من العرگ
بالباب حالة كتل صاغت سواجي دمة
سچين بلمستحة
غفلة وتدچ الدرب
وألشارع من المشي گد ما تمشت جدم
فوگاه ينزف تعب
من سنين ضاع الفرح چن الشفه انلغت
وألضحكة يعني الغضب
ألفضل ميرد ألة صح هو يگطع شجر
بس ألحقيقة نسة
ألفاس شالة الخشب
وجروح عمية وتحب عشگن سوالف ملح
يتوذر بكل كتر
مسؤول عنه الگلب
بالسكتة عيني تون آهات وسط الفكر
ساحة خيالي هجر الچلمة تصبح أرض
ازرعهة طيب أو وفة خضرت شجرة چذب
عالدار مر الوكت شايل اناء العدم
والظمئ باگ النظر
وأنطاني نهب وسلب
بالعكس يمشي الوكت الموت صاير شخص
يحمل معاني الطرب
خيطلي أجمل لحن
لبسني دمعة ونعي
مشطلي شعري بشجن
حتى النفس مو هوة كومة خناجر تطب
وبصدري تسحن سحن
السمع لا موسمع كومة خيوط او أبر
جرت السكتة بعجل
طرزتهة فوگ الأذن
والشلتة فوگ المتن صعدتة يم النجم
شو بس وصل للنجم
ذبالي صرخة سجن
علوجنة مات السهر والليل سم الگمر
والرمش باع النظر
والظلمة صارت ثمن
عش البلابل خطر يملك بشاعة صور
علخضرة ماينتچي
يعشگ سواد الغصن
صوت المحبة بچة ما تنسمع ونته
يبچي بحرارة طفل ضيع اللعبة وزعل
وبالة خاوة الحزن
وبالة خاوة الحزن

وشكرا

[سجّاد البصراوي]

أحسنت
وأجدت عزيزي أحمد ..
قصيدة وجدانية رائعة بكل ما تحمله من معان ِ
اسجّل إعجابي بما كتبت .. واتمنى لك التوفيق الدائـــ ِم ..

[سيد مواد]

روعة ياحسيني ابن عمي عاشت ايدك روعة والله قصيدة اكثر من رائعة اتشرف بالمرور على هذا الابداع
تقبل مروري وعاش قلمك ياغالي

[احمد الحسيني]

مشكور اخوية سجاد على مرورك الجميل

[احمد الحسيني]

مولاي حمودي دتخجلنة بهذا الاطراء الاكثر من رائع مشكور على المرور

[الحمامة88]

صوت المحبة بچة ما تنسمع ونته
يبچي بحرارة طفل ضيع اللعبة وزعل
وبالة خاوة الحزن
وبالة خاوة الحزن
يسلموووووووووووووووووووووووووو

[عراقيه عربيه]

مولاي
قصيده ذوووووووووق
ععاشت الايادي

[احمد الحسيني]

شكرا ياحمامة على الرد وانشا الله تبقين حمامة تنثر اجمل الكلمات على اعضاء المنتدى

[احمد الحسيني]

شكرا عربية على المرور الحلو