قصيدة( صديق الوطن)

[علي الجميلي المسيباوي]

صديق الوطن

اشوفك ياوطن متكدر اوهام
وتصيح الغوث انته ومحد يعين

هواي اسنين مرت وانته مهموم
واشوفك منحني و تصفگ بالايدين

تداوي جروح غيرك وانته مجروح
وتموت اگبال عينك هالمساكين

صير حزام نفسك وانهض بساع
لان دين انته تطلب رجع الدين

الصبر بيك انعرف منك اخذناه
تره اصحاب الصبر كلش قليلين

ياليث الدول مو انته معروف
مو صبر الحمل بالشدة صبرين

ولو مو بيدك انته البيك ديصير
بعض ناسك تره تنكروا بالدين

سلمت العلم للبيهم زماط
وهمه اتگبلوا بس عالملايين

بيك الخير كله وانته محروم
وخيراتك تفرهدهه الجوارين

باگو حته شمسك واصبحت ليل
وشمس ماكو بسماك وهمه شمسين


گوم وداوي جرحك واخذ بالثار
ترضه ترملت بيك النساوين

اخذ ثارك بديك وانسه الانصار
ولتصدگ ترد ثورة العشرين

شفتهم من صحت وي هدة الخيل
ماردولك ترد الحياطين

شگلك ياوطن وشلون اواسيك
كون اصحاب احمد هسه عدلين

انهض من صدگ وارگابنا وياك
تره بيك انته ناس هواي طيبين

داود انته تبقه وبيك الابطال
وسيوف الكون كلهه اگبالك تلين

ولاتحزن بعد ياوطن وتحير
وعلى اليجره ابد لاتدمع العين

تره باچر يرد الخير للدار
وترد ارگابنه اتگص السچاچين

الشـــــ علي الجميلي ـــــاعر
المسيباوي

[مذكرات شاعر الحب والحنان]

انهض من صدگ وارگابنا وياك
تره بيك انته ناس هواي طيبين

عــــــــــــــــاشت ايدك ابو حسين
والله والنعم من الطيبين انشالله نرجع مثل كبل واحسن

[زيزينيا]

عاشتتتتتتتتتتتت ايدك كلش حلوةةةةة

[سجّاد البصراوي]

داود انته تبقه وبيك الابطال
وسيوف الكون كلهه اگبالك تلين


صورة رائــِعة .
وتصوير دقيق حقا ً.. سلمت
وحيّت روحَك الوطنيّة عَزيزي ..

[علي الجميلي المسيباوي]

تحياتي الى احباب گلبي هذا من اخلاصكم لوطنكم وغيرتكم على هذا البلد الجريح اخواني
شكرا الى الاخ ايمن وشكرا الى زيزينيا وشكراالى الاخ سجاد البصراوي
نورتو القصيده حبايب

[ابن حي الجامعة الحرة]

تحياتي علي
موفق تقبل مروري

[علي الجميلي المسيباوي]

حبيبي الغالي ابن حي الجامعه شنو هالمرور الجميل والكلامات الجميله
مشكور حبيب گلبي الك تحياتي واحترامي ممنون اخويه

[˚● ريـــــل العشـــــگـ ●˚]

والله روعة
صح لسانك ابو حسين
ونورنة بالمشاركات الجاية
لاتبخل علينة بجديدك
تحياتي الحارة
سامر البصري

[علي الجميلي المسيباوي]

حبيب گلبي البصري الغالي انشاء الله يعجبكم الجديد والله تسون واهس
للكتابه ترقبو الجديد
شكرا اخويه الغالي نورت القصيده