مسابقــة شعرية لجميع الشعراء هنا *** فمن سيكون الفائز *** ادخلوها

[ضايج من الغربة]

بســــــــــــــــــــــم الله الرحمن الرحيم
اللهم صل على محمد وآل محمد
وبعــــــــــــــــد
الى كافة الأخوة والأخوات أعضــاء منتدى دجلة نت
بمناسبة ولادة الامام الحجه عجل الله فرجه وسهل مخرجه
اخوتي وأخواتي الأعضاء المحترمين جميعا
هنا وفي هذه الصفحه وددنا أن نجعلها مسابقة في الشعر الشعبي
وللجميع حــق الأشتراك في هذه المسابقة
وفي أدناه شروط المسابقة
$$$$$$$$$$$$
اولا ـ أن تكون القصيدة مكرسة فـي مناسبة ولادة الامام المهدي
ثانيا ـ أن لاتقل القصيدة الشعرية عن ستة أبيات
ثالثا ـ للجميع الحق بالأشتراك بالمسابقة
رابعا ـ يكون آخر موعد لتقديم نتاجاتكم سادتي هو يوم 15 /9 /2006 ولاتقبل المساهمات بعد هذا الموعد



خامسا ـ ستتألف لجنة التحكيم من الأخوة اعضاء اللجنة الأدبيه

( الأستاذ ماجد الكاظمي والأستاذ ابو البواري وخادمكم ضايج من الغربة )
سادسا ـ للجنة التحكيم الحق بالأشتراك بالمسابقة ايضا وسيمتثلوا لشروط المسابقه
سابعا ـ على المشترك ان ينشر نتاجه الذي يود الأشتراك به هنا في هذا الموضوع وليس بموضوع منفرد









والآن وعلى بركة الله نعلن عن افتتاح المسابقه ولنرى نتاجاتكم سادتي الأكارم

تحياتي لكم

[MuKaRaM1]

مشكور اخوية الوردة ضايج من الغربة على هاي المسابقة
والصراحة مولانا المهدي ماتوصفة قصايد االدنيا كلها
بس الله يقدرنا ونوصف بعض من صفاتة الي ماتنحصي
عجل الله فرجة

[ضايج من الغربة]

يسعدني ان اكون اول المشاركين واتمنى المشاركة من كل الاخوه الاعزاء


كـَـوطري

*****
اي يروحي ﮔـومي بيعي الحـزن كـله وللفـرح ﮔـومي اشـتري
وجهـچ امعسـم شماله وﭽـنه وصـلة كودري
ﮔـومي نشفي دموع حزنـچ ﮔـومي كـحلي ناظري
ﮔـومي والظيم الحملـته ﮔـام يوجع خاصـري
ﮔـومي احملي الطيب هسـه وعلى البشـر ﮔـومي انشري
ﮔـومي البســي ثياب عــرسـچ ﮔـومي بيهه اتبختري


انچـان لسـه ما عـرفتي حـﮒ اﮔـول اسـتـفـسري
اليوم لهل البيت مولد عـنه لا تتأخري
ﮔـومي روحـيله يروحي هنـاك يمهم ﮔـوطري
ﮔـومي حتى بلا عـزيمه هناك دﮔـي انـﮔـري
ﮔـومي لاهل البيت غـني بالقصايـد واشـعري
ﮔـومي احله اثياب البسي اتبخري واتعطـري
اليوم وياهم افرحي بابن الامام العـسـكـري
ذولـه جدهـم للشفاعـه ليوم تردينه اذخري
جدهـم المختار طه وباﭽـر بيوم الحساب
ﭽـذب يكـسـر خاطـري
آنه خـادمهـم يروحي وزاد بيهـم مفخـري
آنه كل الامل بيهـم يوم اشـهد محـضري
باﭽـر المختار جدهم يـﮔـر عـينـچ وأبشـري
باچـر بيوم الحساب على السراط ايـﮔـول
فـوتي واعـبري
وآنه من حبهـم اطـرز بالمحـاسن دفتري

تحياتي لكم
ضايج من الغربة

[شاعر الاحزان]

بارك الله بيكم على هذا العمل وانشالله يجعله في ميزان اعمالكم يوم لا ينفع مال ولا بنون الا من اتى الله بقلب سليم ولي هذه المشاركة المتواضعه والابيات الخجولة في حق سيدنا ومولانا الامام الحجة بقية الله في الارض عجل الله تعالى فرجه الشريف .

خل نفرح
لازم تفرح إويـــــاي يـــفــــلان
------------------------ صــار أيـــــــــام وشهور حزنان
لازم تفرح حته لو مصيـــــــوب
------------------------ اليوم مولد حجه مو إنــســــــان
إذا ماتــفرح آنــــي ماگول غيـر
------------------------ انت خســـــرت مو آني خسران
حجة الله إعـله كل البـــــريّـــــه
------------------------ وبيه يـــــــــتمم الباري البرهان
بيوم يضهر يـــتــجدد الديـــــــن
------------------------ وبيده ألشريـــــفه يوحد الأديان
هـــذا الإمـــــــام وابــــن الإمـام
------------------------ ابن من قاب قوســــــيــــــن كان
إذا ما تفرح إبفرحة الميـــــــلاد
------------------------ وما عندك معتـــقد في شــــعبان
شرد اســـولف وشـــــــرد اگول
------------------------ اكثر من اخســــــرت يا خسران
سنة ميتين وخمسة وخمســــين
------------------------ شهدت مولد المــــهـدي أكــوان
غمّض اعيــــونك وكون صـادق
------------------------ ولاتصبح ابجلـهــلك ابد حيـران
اتفـقـّـــه واتـــعـــمق بهــل ديـن
------------------------ واتعلم حيــــاتك من الـــقــــرآن
وشوف الاخبــار من الرســـــول
------------------------ عن مولد الحجـة وملكه الأزمان
لا تتعصب وتتمسك ابجهـــلــــك
------------------------ اترك جهلك واترك الجــــهــــلان
وظل متمـــســـك إبآل الرســـول
------------------------ حبل المودة وحبــــل للفرقـــــان
وابد لا تتعاند إويــــــاي ارجوك
------------------------ ملگيت غيــــري نِد يـــا بطران
وك ادوخك وآني إعــــله الحگ
------------------------ واخليك ابلا خمر دايخ وسكران
عندي الك ميت الف دليـــــــــل
------------------------ وميت الف حجه والف بـــرهان
خل انلم الــشــــمل آنه ويــــــاك
------------------------ ونرجع للمحبة ونبقه صحبــــان
وانخلي المنتظر بأحداق العيون
------------------------ وننتظر جيتة التسگي العطشـان
ومانجعل بينه العده يــــــفرقون
------------------------ والمنتــــظر هَم حاضر و سمعان

اخوكم شاعر اهل البيت عليهم السلام
شاعر الاحزان / ماجد الكاظمي.

[جواد الحسيني]

اللهم صلي على محمد وال محمد
مبروك ميلاد قائم ال محمد
ارجو المعذرة سادتي الافاضل
اروع ما كتبتم من قصائد ومن كلام مشكوررررررررر الى الاخ ماجد الكاظمي والى العزيز ضايج من الغربة
وارجو المعذرة
جواد الحسيني

[شاعر الاحزان]

مشكور يا وردة اخوي العزيز

[MuKaRaM1]

هذي قصيدتي البسيطة والصراحة الواحد يعجز شيوصف هؤلاء الأئمة الاطهار
لكن نسال الله ان نكون قد وفقنا بان نوصف بعض من صفاتهم الي لاتعد ولاتحصى

اكتب ياقلم سطر عل اوراق = حروف مرتبة وبوزان ونظامة
بميلاد الذي حجتنـــا للناس = امام الطيب وتاج اهل الامامة
يل بميلادك انتة تنور الكون = ومحى ظلم الوكت وانهى ظلامة
يمولاي الفخر انتة وبيك من اجيال = وشجاعة من علي وعندك كرامة
الظلم عند البشر صاير بلاحساب = وانت للعدل اكبر علامة
ابوك ودجك انتة وحت رسول الله = تشهدلك بطلعة وحت زعامة
شكت انا كلي وشوصف شلون = شكولت بيك صدك مو ندامة
وياشعر يوصفك بكل الازمان = ما يخلص ترة ويخلص كلامة
من من يظهر يفيض العدل عل ناس = ميزان العدل بيدة وحسامة
ترة المهدي قيامة يصير عل كفار = وياكافر نجى بيوم القيامة

سامحونا على القصوور
::37:: ::37:: ::37::

[شاعر الاحزان]

شكرا كرووووووووووووووووووومي

[ضايج من الغربة]

شكرا على مشاركاتكم اخوتي الاعزاء شاعر الاحزان ومكرم وارجو من جميع الاخوان المشاركة

تحياتي لكم

ضايج من الغربة

[نونة القلب]

أهنيكم
اهنيكم بولادة الامام المنتظر (عج)وبصراحه مهما كلنا بحق الامام هذا قليل واريد اشارك بيتين لشاعر ال البيت جابر الكاظمي
بدر من عالم التقديس شعبان
وانواره بمعالي الفخر شعبان
بالخامس عشر من شهر شعبان
انولد شبل الحسن وانتشر ضيه
اختكم نونة

[abo_alboware]

اللهم صلي على محمد وآل محمد.بارك الله بكم اخوتي الكرام على مشاعركم الرائعه هذه ِ وسدد الله خطاكم ورزقكم شفاعة محمد وآل محمد.
يا مكرم انا صححت كلمتين في مقدمه كلامك كانت فيها الحروف غير مرتبه.وارجو منك انت ان تصحح ما في القصيده لاني اعتقد رايت فيها حروف زائده سقطت سهوا ً.
مع تحياتي لكل الاخوة وبارك الله بالجميع

[امبراطور الكراده]

القصيدة بعنوان (مته ويايوم نتلاگه يمحبوب)


متــــه ويايـــــوم نتلاگـه يمحبــــوب يمحبــــوب

إلك هالشيعــــه مشتاگـه يمحجـــوب يمحجـــوب

ظـُهورك ينحسب عيد نريــد إنعــيّــد إبعـيـد
مته العيد مته العيد مته العيد
*****
يا سيّـــــدي يبـــن الحســـن يامــــن وجودك رَحمه
إنتــــــه البقـيّــــــه الباقيـــه مـــــن النبــــي واليمّه
جَــــــدّك رســــول الله ابتده هالنَهَــج وإنته اتختمه
إبجُملــــــة صِفاتـــك تِشبهه مو بس تِشبهه بإسمه
يالرحمتـــك إعجـــــاز من رب البشر
يامَـــن سِجَدلك بالصَبُـــــر هام الدهر
الله يعينــــــــــــك يالأمــــــــام المُنتظـــــــر صابــــر على هالأمّه
يعينــــــك ربّـــك إيعينك على الگوم علـى الگوم
يســــاوي اليوم بسنينك ألف يـــــوم ألــــف يوم
نِريـــد السيـــــف بالأيد نريــد إنعـيّــد إبعـيــد
مته العيد مته العيد مته العيد
*****
شعـبــــان أشـــرق مـــن بزغ وجهـك ابنوره اعلينه
لاچــــن غـيابـــــك سيّـــــــدي يبــــن الحسن ماذينه
حاولنــــه نفـــــرح من صِدِگ حاولنـــه ننسه البينه
إتبسـّمنـــــــه لاچـــــن غيبتك صالــــت وجالت بينه
مبتسمـــــه شِفـــّـتـنه ودمعنه منحدر
هالغيبــــه طالـــــت سيّدي وتاه الفكر
شيعــة علي بـــــس ابقدومــــــك تبتشـــــر بشـّـــــرنه يا مهدينه
أملنه انطيـــــح جِدّامــك على المـوت علـى الموت
قريبــــه اتبيّـــــن أيّامك إجه الصوت إجه الصوت
يغايب تـــدري شنــريد نِريــد إنعـيّـــد إبعـيـد
مته العيد مته العيد مته العيد
*****
يـــــوم المبـــــارك من تِجي هاليـــــوم يــوم مبارك
اليـــــوم الظهــــــور اتراقـبه أعـــــدآئــك وأنصارك
اليملــــك حَميّــــــه ينتفــــض ويّـــــاك يطلـــب ثارك
ثـــــــارك جَمُـــــر من ينوخذ هـــم تبگه تسعر نارك
والله لو تمحــــي الأرض يبن الحسن
مَتســـــاوي أنـّه من ونين ام الحسن
جَرحك غميـــج إبگلـُــــب كـــل شيعي إندفن وصلتنه كــل أخبارك
جِزينه سنيــــن هِجرانك بالهمــــوم بالهمــــــوم
ولو لليـــــــــوم عنوانك ممعـلــــوم ممعـلــــــوم
ابغيابـــك إحنـــه مَنهيد نِريــد إنعـيّــد إبعـيــد
مته العيد مته العيد مته العيد
*****
مــــن مكـّــــه لمّـــــن تعتني الصوب المدينه بسيفك
يــــم الغـديـــــر ابخــم تِگـف لحظــــات تِرسم طيفك
مـــــن ويــــــن ثــارك يبتدي ثارك صُبــــــح تكليفك
السيفــــك تِحاچيـــتــه ابدمع وتگلـّـــه صول ابكيفك
يا ذو الفقــــار اليــوم إخذها الراحتك
ياسيفـــــي ما تحتـــــاج ألزم قبضِتك
ابدم الرگــــاب إروي عطشهــــا الشفــرتك هاليوم إخـذ كل حيفك
يسيفـــي من يجي يومك لـَـــتحتـــار لـَـتحتــــــار
وحَقـــّــك مَحّــــد يلومك يبتــــــــــّار يبتــــــــــّار
مَـتــه الماضيّـــك إتعـيد نريــد إنعـيّــد إبعـيـد
مته العيد مته العيد مته العيد
*****
يا شيعـتــــي ابطــــف كربله مـــــن نلتقــي يم جَدّي
تشوفـــــــون أصــل الواقعه الگطـّعـت گلب المهدي
تشوفوني محني إعله الطِفِل والدمعـــه تِجرح خَدّي
يا رحمــــه تبگـه ابهالگلـُب كل رحمه مَتظل عندي
آنه الچنــــــت رحمة الباري الواسعه
الرحمـــه أبدّلها ابغضب عالمشرعه
ابيا عين أشوف چفوف عمّي إمگطـّعه اهناك الدمع ما يجدي
يبو صالــــــح أنه عَمّك غبت ويـــن غـبــت وين
صُفــــت ثاراتنـــه يمّك شِبه دَيــــن شبــــه دَين
لترحــــم زُمــــرة يزيد نريــد إنعـيّــد إبعـيــد
مته العيد مته العيد مته العيد
*****
امبراطور الكراده

[MuKaRaM1]

يسلمو اخواني على قصائدك الحلوة

[ضايج من الغربة]

السلام عليكم ورحة الله وبركاته

شكرا جزيلا اخوتي الاعزاء على المشاركة في هذه المسابقه والتي تسهم في رفع مستوى منتدانا العزيز في الشعر الشعبي ...

اليوم اغلقت المشاركات في هذه المسابقه و اي مشاركة توضع هنا تعتبر خارجة عن المسابقه ...
ومن اليوم ارجو من الاخوه الاعزاء ترشيح اجمل قصيدة كتبت في حق الامام المهدي عجل الله فرجه ولا يجوز الى الاخوه المشاركين الترشيح في المسابقه ...

طريقة الترشيح هي ذكر اسم القصيدة واسم الكاتب ومدة الترشيح 7 ايام من تاريخ اليوم ...

ولكم مني اطيب التحايا
وتمنياتي بالموفقيه للجميع

اخوكم
ضايج من الغربة

[جواد الحسيني]

والله كلكم مبدعين وروعة كلماتكم تذهب العقل اخي ضايج من الغربة مبدع وراقي وفنان
وحبيبي ماجد الكاظمي راقي والاخ مكرم ايضا كذلك
وكلكم اعزكم واحترم اشعاركم اذا ايصير ارشح الكل اني ارشح الكل بس اذا جبرتوني على التحديد
فار شح
( خل نفرح ) للشاعر ماجد الكاظمي
وعذرا للاخوان الاعزاء
http://www.hussamaliraq.com/FOTOIRAQ.1/20.JPG

[امبراطور الكراده]

اني مشارك لو ممشارك؟

[ضايج من الغربة]

اني مشارك لو ممشارك؟

نعم اخي العزيز انت مشارك لكن لا يحق لك التصويت

تحياتي

[علی الصائغ]

یبن الحسن ضاگ الصدر وسعه**لضهورک گوم شد العزم وسعه**الضالم هدم گبر الحسن وسعه ** لگبر جدک علی حامی الحمیه**********یبن الحسن گوم انهظ لهل الشده** والجرح زاد وکلف یصعب بعد شده**حملک یشبل الحسن علنایبه شده**فعل الرذیله نتشر علوادم وانه**وگلب الیحبک یون ماتسمع الونه**ندری البشر مو سوه مختلفه الوانه**لاکن جرح شیعتک کوم انهض وشده

[شاعر الاحزان]

هسه احنه يصير انرشح لو لا ؟

[زيـنـبـيــة]

ارشح قصيده الاخ امير الكراده ... (متى ويايوم نتلاقى يا محبوب )

واحي في قصيدته احساسها الصادق بمعنى الغيبه والم الامام
عجل الله فرجه