عاشق المدني
05-02-2007, 11:05 AM
صديقتي المهاجره / المهجّره ..
وينج انتي..وين هسه..بيا مكان..بيا زمان..بأي حال..بعدج تتذكرين..لو ليل عمان وأضوية شوارعها نسّوج ليالي بغداد الحزينه الخاليه؟؟ شون أحوالج؟؟ وكيف الأمور.. بعده قلب ذاكرتج ينبض بذكرانه.. لو تراب النيسان والغربه طوى اللحضات الحلوه الحزينه اللي عشناهه هنا للأبد..
وينج أنتي .. وين هسه .. شدتسوين .. شتاكلين ... شتشربين ... شلون عايشه ايامج..حزينه ..فرحانه؟؟ بعدهه مرايات عيونج تباوع على الكاع من تمشين..وحمرة خدودج تتلألأ من بين ليالي شعرج البغدادي الأسود.... وينهه خزرة عيونج الخايفه...وأبتسامة شفايفج المرتجفه..وين صفناتج الملائكيه.. وين حركات اديج المتردده .. مشيتج المرتبكه....عطرج.. ملامحج... وجهج ..بياضج..... ويــــنج أنتي؟! سؤال مليت منه ومل مني..مل حتى دخان جكارتي اللي تحترك ويه كل احتراق يومي أعيشه عليج..وبحسرة أخبارج..اللي ظاعت مثل ماظاع شباب بلد يسموه العراق..
وينج أنتي؟؟ ووين مساطب المعماري البارده..وحدايق القسم اللي ماجانت بيهه ورده غيرج.. وين الدردشات الأبديه للجايين والرايحين على شارع المعماري العتيك...وين شتويات القسم ..الضاعت بين حرارة جاي الكافتريا ودفو عيونج المغيمه .. وينهم صديقاتج ونظراتهم الجريئه وضحكاتهم المخنوكه من مجنون أجه لقسمهم وبأيده جريده ..وكعد خمس ساعات حتى يملي عينه من طفلتهم الخجوله... وينهه ساعات الأنتظار الطويله اللي جنت أعتصرهه من أيام عمري...اللي ضاعت مثل ماظاعت حبيبه .. بين شوارع عمان وبغداد..
وينج أنتي.. وينج عن انسان مخبل كعد يبجي هذيج الظهريه الحزينه على الشط يم بقايا جسر منتحر..أسمه الصرافيه .. بعدج تتذكريه؟؟ تتذكرين كم مره ظمتنه سيارة خطنه سويه اني وياج حتى تعبر بينه بهدوء على ظهره؟؟ تتذكرين شكد تبادلنا نظرات بريئه سريعه بشتويات هذا الجسر وصيفياته؟؟ كم نهار سعيد لذيذ قظيته أبوك بيه نظره وره نظره على جبالج..وسهولج..وشلالات شعرج الأزليه..وجبينج الشفيف الناصع .. ووقوس قزح عيونج .. ياما أخذتني صفناتي المراهقه بوكتهه على مراية خدودج..وهيه تعكس خيوط الشمس والظل اللي تنفذ من بين حديد الجسر وأعمدته...
الجسر وكع صديقتي..الجسر وكــــــــــــع..بس ذكرياتج بعدهه عليه..حتى ريحتج للحضه أشمهه بيه..شوفي المفارقه.. الجسر غصبا عليه –أو باختياره , ماكو فرق- عانق حبيبته دجله أخيرا وآني يوم بعد يوم يزيد عدد الأميال والعوالم اللي تفصلني عنج...
وينج أنتي؟؟ ووين رصيف شارعنه الأثير..الحبيب..اللي لحضة الخطت رجلي عليه بهذاك الخريف الناعم...شفتج لأول مره...شكد أحتظني هذا الرصيف بلحضات حزينه..وسعيده..شكد تشرّب من آهاتي..وذاب من قهري .. وشكد ضحك من خطط وهميه نسجتهه بسذاجه وياه حتى أفوز بيج...
يارصيف الخير يا أحلى رصيف
قلبي ذاب وياك من ذاك الخريف
الرصيف أخذوه مني هسه صديقتي..هجّـروني وأخذوا البيت والذكريات .. والرصيف....عزعليهم حتى رصيف شوفتج يعوفولياه صديقتي...شراح يسويلهم رصيف عطّرته بأسمج وصبغته بذكرياتج ؟؟ شراح يفيدهم ...
ويــــــــــــــــــــــــنج أنتي...وينج عن أنسان محزون..مهموم..يكحل حلمه بيج كل ليله..ويرتد الداخله مليون مره باليوم حتى يجتر ذكريات عتيكه..وصور..وأوهام..وملامح مشوشه..وأسم وهمي..لبنيه أنخلقت..حتى تنحب..وتهاجر..
وينج أنتي عن فجر هذاك الأربعاء الوردي..من زرتيني بالحلم ..وجنتي تعبانه..وضايجه ..وشكلج متغير..وكلتيلي بصوتج اليفيض كمانات عراقيه حزينه..وعذبه.. " هاي وينك أنت..آني ما مرتاحه كلش " ..ومن صحيت – وياريتني ماصحيت -..لكيت الفجر مشبّع بريحتج..وفراشي المزروع أشواك واسمنت مسلح.. خدران بنعومة أيدج...ومصطبغ بأحلى ألوانج.... شكد تأثرت لأن شفتج حزينه..ومو أنتي..وشكد أنقهرت من سمعت بعد يومين اللي صار على أخو زوجج.. عرفت ساعتهه ليش أجيتيني بهاي الحال..وعرفت شكد غريبه وخرافيه ومسكينه هاي الروح اللي تغافلني وأتيه بعوالم غيبيه وعنقائيه..حتى توصل عالمج.. وتتقصى أخبارج .. منّج..
صديقتي البعيده...شنو اللي ممكن ينطيه الأنسان ويبذله حتى يوصل اللامحدود ويسوي اللي يريده ؟؟ شنو نوع التعاويذ والسحر والخيال اللي يكدر يستحظره حتى يرجّع الزمن ليوره ويدور خارج حدود مدارات القسمه والنصيب والقضاء والقدر؟!! أي معجزه يريدلي أخلق حتى احظى بلحضه..لحضه وحده صافيه..خارج الزمن والحدود..أشوفج بيهه وأغادر حزني وضياعي وهزيمتي للأبد..
كفرت بهذا الزمن .. وكل زمن يخلي وسيلة أتّصال مشتاق بحبيبه من خلال واير.. وايرغبي ملعون مرتبط بحايط جامد... كفرت بكل قوانين الطبيعه الأبديه ودورتهه الأزليه الروتينيه اللي تمنعني أشاركج اللحضه والأحساس....والعمر....
خسرتج صديقتي آني..خسرتج وأنتي بعـــيده...وغريبه..ومهاجره..ومهجـّره ..
خسرتج... ورحتي لشوارع غريبه .. وعفتيني بشوارع..هم غريبه...
مثل حجاره قديمه غافيه بقاع نهر راكد عفتيني ..
مثل فزّاعة مرعى...بحقل محترك..عفتيني.....حزين عفتيني ..
حزيـــــــــــن...
بكد حزن بغداد .. وشوارع بغداد ..آني حزين..
بكــد حزن الوزيريه.. والعطيفيه..على أفتراقهم .. آني حزين ..
بكـــد أحلام مهـجّرين وطني المحتظر..آني حزين...
بكد حزن " زعلي طوّل أنا ويّاك " ..آني حزين ...
بكد حزن كلمة حــــزين.. آني حـــزين ..
حزيـــــــــــــــــــــــــن ..... وأحــبّــج !!
وينج انتي..وين هسه..بيا مكان..بيا زمان..بأي حال..بعدج تتذكرين..لو ليل عمان وأضوية شوارعها نسّوج ليالي بغداد الحزينه الخاليه؟؟ شون أحوالج؟؟ وكيف الأمور.. بعده قلب ذاكرتج ينبض بذكرانه.. لو تراب النيسان والغربه طوى اللحضات الحلوه الحزينه اللي عشناهه هنا للأبد..
وينج أنتي .. وين هسه .. شدتسوين .. شتاكلين ... شتشربين ... شلون عايشه ايامج..حزينه ..فرحانه؟؟ بعدهه مرايات عيونج تباوع على الكاع من تمشين..وحمرة خدودج تتلألأ من بين ليالي شعرج البغدادي الأسود.... وينهه خزرة عيونج الخايفه...وأبتسامة شفايفج المرتجفه..وين صفناتج الملائكيه.. وين حركات اديج المتردده .. مشيتج المرتبكه....عطرج.. ملامحج... وجهج ..بياضج..... ويــــنج أنتي؟! سؤال مليت منه ومل مني..مل حتى دخان جكارتي اللي تحترك ويه كل احتراق يومي أعيشه عليج..وبحسرة أخبارج..اللي ظاعت مثل ماظاع شباب بلد يسموه العراق..
وينج أنتي؟؟ ووين مساطب المعماري البارده..وحدايق القسم اللي ماجانت بيهه ورده غيرج.. وين الدردشات الأبديه للجايين والرايحين على شارع المعماري العتيك...وين شتويات القسم ..الضاعت بين حرارة جاي الكافتريا ودفو عيونج المغيمه .. وينهم صديقاتج ونظراتهم الجريئه وضحكاتهم المخنوكه من مجنون أجه لقسمهم وبأيده جريده ..وكعد خمس ساعات حتى يملي عينه من طفلتهم الخجوله... وينهه ساعات الأنتظار الطويله اللي جنت أعتصرهه من أيام عمري...اللي ضاعت مثل ماظاعت حبيبه .. بين شوارع عمان وبغداد..
وينج أنتي.. وينج عن انسان مخبل كعد يبجي هذيج الظهريه الحزينه على الشط يم بقايا جسر منتحر..أسمه الصرافيه .. بعدج تتذكريه؟؟ تتذكرين كم مره ظمتنه سيارة خطنه سويه اني وياج حتى تعبر بينه بهدوء على ظهره؟؟ تتذكرين شكد تبادلنا نظرات بريئه سريعه بشتويات هذا الجسر وصيفياته؟؟ كم نهار سعيد لذيذ قظيته أبوك بيه نظره وره نظره على جبالج..وسهولج..وشلالات شعرج الأزليه..وجبينج الشفيف الناصع .. ووقوس قزح عيونج .. ياما أخذتني صفناتي المراهقه بوكتهه على مراية خدودج..وهيه تعكس خيوط الشمس والظل اللي تنفذ من بين حديد الجسر وأعمدته...
الجسر وكع صديقتي..الجسر وكــــــــــــع..بس ذكرياتج بعدهه عليه..حتى ريحتج للحضه أشمهه بيه..شوفي المفارقه.. الجسر غصبا عليه –أو باختياره , ماكو فرق- عانق حبيبته دجله أخيرا وآني يوم بعد يوم يزيد عدد الأميال والعوالم اللي تفصلني عنج...
وينج أنتي؟؟ ووين رصيف شارعنه الأثير..الحبيب..اللي لحضة الخطت رجلي عليه بهذاك الخريف الناعم...شفتج لأول مره...شكد أحتظني هذا الرصيف بلحضات حزينه..وسعيده..شكد تشرّب من آهاتي..وذاب من قهري .. وشكد ضحك من خطط وهميه نسجتهه بسذاجه وياه حتى أفوز بيج...
يارصيف الخير يا أحلى رصيف
قلبي ذاب وياك من ذاك الخريف
الرصيف أخذوه مني هسه صديقتي..هجّـروني وأخذوا البيت والذكريات .. والرصيف....عزعليهم حتى رصيف شوفتج يعوفولياه صديقتي...شراح يسويلهم رصيف عطّرته بأسمج وصبغته بذكرياتج ؟؟ شراح يفيدهم ...
ويــــــــــــــــــــــــنج أنتي...وينج عن أنسان محزون..مهموم..يكحل حلمه بيج كل ليله..ويرتد الداخله مليون مره باليوم حتى يجتر ذكريات عتيكه..وصور..وأوهام..وملامح مشوشه..وأسم وهمي..لبنيه أنخلقت..حتى تنحب..وتهاجر..
وينج أنتي عن فجر هذاك الأربعاء الوردي..من زرتيني بالحلم ..وجنتي تعبانه..وضايجه ..وشكلج متغير..وكلتيلي بصوتج اليفيض كمانات عراقيه حزينه..وعذبه.. " هاي وينك أنت..آني ما مرتاحه كلش " ..ومن صحيت – وياريتني ماصحيت -..لكيت الفجر مشبّع بريحتج..وفراشي المزروع أشواك واسمنت مسلح.. خدران بنعومة أيدج...ومصطبغ بأحلى ألوانج.... شكد تأثرت لأن شفتج حزينه..ومو أنتي..وشكد أنقهرت من سمعت بعد يومين اللي صار على أخو زوجج.. عرفت ساعتهه ليش أجيتيني بهاي الحال..وعرفت شكد غريبه وخرافيه ومسكينه هاي الروح اللي تغافلني وأتيه بعوالم غيبيه وعنقائيه..حتى توصل عالمج.. وتتقصى أخبارج .. منّج..
صديقتي البعيده...شنو اللي ممكن ينطيه الأنسان ويبذله حتى يوصل اللامحدود ويسوي اللي يريده ؟؟ شنو نوع التعاويذ والسحر والخيال اللي يكدر يستحظره حتى يرجّع الزمن ليوره ويدور خارج حدود مدارات القسمه والنصيب والقضاء والقدر؟!! أي معجزه يريدلي أخلق حتى احظى بلحضه..لحضه وحده صافيه..خارج الزمن والحدود..أشوفج بيهه وأغادر حزني وضياعي وهزيمتي للأبد..
كفرت بهذا الزمن .. وكل زمن يخلي وسيلة أتّصال مشتاق بحبيبه من خلال واير.. وايرغبي ملعون مرتبط بحايط جامد... كفرت بكل قوانين الطبيعه الأبديه ودورتهه الأزليه الروتينيه اللي تمنعني أشاركج اللحضه والأحساس....والعمر....
خسرتج صديقتي آني..خسرتج وأنتي بعـــيده...وغريبه..ومهاجره..ومهجـّره ..
خسرتج... ورحتي لشوارع غريبه .. وعفتيني بشوارع..هم غريبه...
مثل حجاره قديمه غافيه بقاع نهر راكد عفتيني ..
مثل فزّاعة مرعى...بحقل محترك..عفتيني.....حزين عفتيني ..
حزيـــــــــــن...
بكد حزن بغداد .. وشوارع بغداد ..آني حزين..
بكــد حزن الوزيريه.. والعطيفيه..على أفتراقهم .. آني حزين ..
بكـــد أحلام مهـجّرين وطني المحتظر..آني حزين...
بكد حزن " زعلي طوّل أنا ويّاك " ..آني حزين ...
بكد حزن كلمة حــــزين.. آني حـــزين ..
حزيـــــــــــــــــــــــــن ..... وأحــبّــج !!