اريد الحل وبسرعه لان بعد مااتحمل (بس اريد الرد بصراحة )امانة عليكم

[rose of iraq]

السلام عليكم شباب وبنات
اني مشكلتي بدت من ستة اشهر جنت عايشة ببغداد والحمد لله ومتوقعت الايام لح تصير هيج
المهم من ستة اشهر تركنا البلد لاسباب الكل يعرفها واجينا لمصر ................
وياريتني ماجيت لان تركت الناس الي احبهم وكليتي الي انتضرتها سنين والي جنت احلم بيها والحمد لله حصلت عليها بس للاسف ولا يوم داومت بيها
اجيت ومجنت متوقعه هيج يصير اربع وعشرين ابجي اريد ارجع بس مااكدر اعوف اهلي ولا اكدر ارجع لان الاوضاع مو شي ويوم عن يوم وضعي يسوء اريد حل وبسبب وضعي احس اهلي يزعلون مني لان دائما يشوفوني ضايجة وابجي بس شسوي مو بيدي اريد منكم حل وبصراحة واعتذر على الاطالة

[rose of iraq]

السلام عليكم شباب وبنات
اني مشكلتي بدت من ستة اشهر جنت عايشة ببغداد والحمد لله ومتوقعت الايام لح تصير هيج
المهم من ستة اشهر تركنا البلد لاسباب الكل يعرفها واجينا لمصر ................
وياريتني ماجيت لان تركت الناس الي احبهم وكليتي الي انتضرتها سنين والي جنت احلم بيها والحمد لله حصلت عليها بس للاسف ولا يوم داومت بيها
اجيت ومجنت متوقعه هيج يصير اربع وعشرين ابجي اريد ارجع بس مااكدر اعوف اهلي ولا اكدر ارجع لان الاوضاع مو شي ويوم عن يوم وضعي يسوء اريد حل وبسبب وضعي احس اهلي يزعلون مني لان دائما يشوفوني ضايجة وابجي بس شسوي مو بيدي اريد منكم حل وبصراحة واعتذر على الاطالة

[زمردة]

http://dailyjokeonline.com/winner.html والله يا اختي اتمنيت اساعدج بس ما بايدي شي

بس خلي ايمانج بالله قوي واكيد ان شاء الله الامور تتحسن وترجعون

وثقي بالله لان الله ابدا ميتخلى عن عبدة وخصوصا انت بالغربة وبضيق فتوجهي لله وبس
.

[pharma]

السلام عليكم
اختي من حقج تبجين على العراق الي راح من ايدين الكل وصدكيني الي عايش ببغداد نفس الي عايش خارجه لان بغداد مو هي بغداد الي كانت من كل النواحي هو شبقى من بغداد حتى لو تمشين بالشارع لا اهلها ولا ناسها ولا شوارعها ولا خيرها ولا اي شي من زمان باقي .........مع الاسف اذا تشوفيها ماتعرفيها !!!!!!!!!!!
وصدكيني الي بالغربة يتحصر على دجلة وعلى معالم بغداد والي عايش ببغداد هونفسه ما شايفها يعني هيج هيج كلنا سوى والله غيرج ناس تتمنى فرصة الخروج مو لان احلى لالالا لكن فقط لكي تطمئن على اهلها غيركم ناس ما قادرين يخرجون وهم مهددين
اكو ناس وشباب بالاخص محبوسين ببيوتهم حتى خروج للشارع مايقدرون بمناطقهم
يعني لازم تفكرين بطريقة انه انتي اهلج سالمين والحمد لله وحقج تبجين وتضوجين بس لازم تقوين ايمانج بالله وتتاقلمين مع الوضع واحمدي الله انتي طلعتي من العراق واهلج سالمين وما صابهم اي شي من هالاوضاع وعسى ان تكرهوا شيئا وهو خير لكم وصدكيني غيرج طلعوا وهم ندمانين على تاخيرهم لان فقدوا واحد من العائلة واضطروا بعدين للخروج وحاولين تعيشين وتتاقلمين
وندعي من الله يرحم العراق والعراقيين ويرجعهم لبلدهم سالمين ياااااااااااااارب
تقبلي رايي البسيط

[مراكو]

اختي العزيزة هواااااية ناس مثل حالتج بس دائما اذكري انه انتي اهلج وياج وحواليج ووضعج يمكن احسن 100 من مرة من وضع غيرج وان شاء الله ترتاحين وتريحين اهلج وياج

[قمر الحب]

طبعاا ياعيني الحل بأيدج انتي

لان احنا مراح نكدر نكولج غير الله يصبرج ويصبر كل العراقيين المغتربين ويارب ترجعون لناسكم واهلكم

بس نصيحتي الج ان ترضين بالواقع لان صدكيني هسة ماكو احد مرتاح الكل عنده مشكلة

واجوز انتي مشكلتج الها حل بس اكو ناس ماكو حل لمشاكلهم

يعني انتي اذا بجيتي وحزنتي وانقهرتي وظليتي حابسة روحج صدكيني مراح توجهين شي

حاولي ان تكيفين نفسج على حياتج وارضي بيها شلون متكون وباوعي دائما على الي اقل منج

اسفة اذا طولت عليج بس اتمنى ان اكون سويتلج ولو جزء قليل حتى ما تظلين ضايجة

تقبلي مروري وتحياتي الحارة

[الزعفراني البغدادي]

الحمد لله على كل شي ارضي بقضاء الله مادام اهلك هناك لازم تضلين وياهم اما على وضع العراق فل الحمد لله اكو ناس عايشين بخير واكو لا مثل قبل يوم لكم ويوم عليكم
والحمد لله على كلشي
وما تضل هيج تفرج
تحياتي

[عـ ـ ـراقـ ـيـ ـة مغـ ـ ـتربـ ـ ـة]

اني اوفق راي الاخت قمر الحب
اختي اني شعرت بكل كلمة كتبتيها لان مريت بنفس الشئ تماما ضليت مدة طويلة من الغربة بس اكظيها بجي وقهر بالرغم الدولة اللي اني بيها الك يتمنى يجيها وكل شئ مو بعيني
بس بعدين فكرت بشئ واحد ان عمري من عمر الزهور ومستحيل راح يرجع وانت هم نفس الشئ صدكيني حرامات تضيعين هذه السنين اللي هية من احلى ايام عمرج بهيج حالة طلعي وتونسي وضحكي على قد متكدرين وكوني سعيدة
واذا انت تردين هذا الشئ راح تسويه صدكيني لان بداخل كل انسان ارادة اقوى من كلشئ
انا كنت اقول ان الحزن اقوى مني بس الصراحة اكتشفت انو اني كنت مستسلمة
وفكر بشئ واحد ان اذا هذولة السفلة كدرو ياخذون مكانج وبلدج بس مراح يكدرون ياخذون ساعدتج وحياتج
لاتخليهم يهزموك وياثرون عليك كوني سعيدة واقوى من اي شئ
اني كلش همتني مشكلتك لان كنت اعاني منها واعرف معناها
واتمنى ان تتجاوزيها مثل ما اني تجاوزتها
كوني قنوعة بالامر الواقع وحاولي ان تتماشي معه

وتمنياتي لك بالسعادة ان شاء الله

[rose of iraq]

والله مااعرف شلون اشكركم والله يخيلكم على ردودكم الحلوة اللي صدك شوية اقنعتني بالواقع
وان شاء الله يرجع الامان ونرجع كلنا لبلدنا
مشكورين

[زين الدين زيدان]

مشكوررررررررررررررررررررررر

[اسيرة ولكن]

الله يصبرج والله يصبر الكل
وانشاء الله تلكين الصديقة الي ترتاحين الها

[هاني سلامه]

ما عندي كلام اقوله الا مثل ما قال كاظم الساهر

الله على البلوه يعينك

[بغداد دار السلام]

والله ياوردة حالتج بالضبط مثل حالتي واثنيناتنا بمصر
واني هم الوقت كله كاااااااااااااااااابة وبس اريد ارجع
بس تدرين شنو الحل
سوي مثل مااني سويت
تفرجي اخبار العراق هواية واسمعي اخبار العراقيين راح دائما تكولين الحمد لله انه طلعت وخلصت واهم شي تحمدين الله انه اهلج محد تأذى منهم
والله اني هم دائما اكول شمعنى احنة وليش من دون الكل اني مكملت كلية بس من اسمعش هذا اخوه انقتل وهذا ابوه مااعرف شبيه اكول الحمد لله والشكر على كل شي
اوكي حبيبتي ولتضوجين ان شاء الله يستقر الوضع ونرجع كلنا
الله مينسى احد
تحياتي

[سندباد بغداد]

اخوية توكل على لله وستعين بالقران لان الرجوع للبغداد صعب جد ا وهسة امنيت كل شاب يغادر العراق بسبب الظروف اللى دتصير بالدنا الغالي بس انشاء لله ازمة وتعدي

[محمد زيونه]

والله بس الله يصبرج ويصبرنه وياج على الغربه يا اختي كلنه نفس الحاله اني هم تركت كليتي واهلي واصحابي واجيت ابحدي بمصر علمود اخلص من الوضع وانتي حمدي ربج واشكري انو اهلج وياج لان هوايه ومن ضمنهم اني اهلي بعدهم بالعراق واني لا اكدر ارجع لان كليه سجلت واستقريت ولا همه ايكدرون يجون بس هم اكول الحمد الله والشكر احسن من غيري فحمدي ربج وانشاء الله تفرج ونرجع للعراق

[دندون]

اختي روز اني اريد اكلج واكول لكل الاخوه والاخوات المغتربين تره كلنه نفس الشي اني عايشه بالعراق وهم عفت الكليه وهم هاي اول سنه الي بالكليه واللي دا انتظرها بفارغ الصبر وبعدين...........؟؟؟!!!! اذاً نفس الشي ان كنت عايشه بالعراق او خارج العراق هذا الشي شمل العراقيين كلهم الله يصبرنا على بلوانا ويجعلنا في منزله الصابرين
تحياتي روز

[دندون]

اختي روز اني اريد اكلج واكول لكل الاخوه والاخوات المغتربين تره كلنه نفس الشي اني عايشه بالعراق وعفت الكليه وهم هاي اول سنه الي بالكليه واللي دا انتظرها بفارغ الصبر وبعدين.......!!!؟؟ اذاً نفس الشي ان كنت عايشه بالعراق او خارج العراق هذا الشي شمل العراقيين كلهم والله يصبرنا على ما ابتلانا ويجعلنا من الصابرين
تحياتي روز

[زهــــــراء القلـــوب]

حال هواي اكثر الاشخاص خارج العراق
بس شنو بيدنا

الله كريم على كل حال
وان شاءلله فترة وتهدئين وتتعودين علوضع

بلتوفيق

[القيسية]

ولا شي لانه كلنا نفس الشي حبيبتي